呢輪晚晚開party，好多紅酒開咗飲唔晒，倒咗好鬼嘥；特別係公司有個自稱才子嘅同事貴公，好鍾意失驚無神偷偷地開咗人哋支紅酒，飲咗幾啖，塞番個塞就算數（有時連樽口都唔塞），過咗幾日支酒氧化晒冇味，咁就報銷。
小妹想話畀貴公知，唔介意佢攞酒飲，但飲完後話畀人知，等小妹諗吓有乜辦法貯好支開封紅酒，擺多幾日等其他人可以飲。
品酒師劉致新教路話，越靚嘅紅酒，開封後飲唔晒但有適當保存，味道會更加好飲㖭。最簡單直接嘅方法就係塞番個水松塞，放喺雪櫃度就得，「啲酒越靚，開咗封後再放喺雪櫃，畀佢多啲時間透氣，味道仲好啲；而一般嘅紅酒開封後放喺雪櫃都可以保持品質，但點都唔可以放超過三、四日。」佢話，雪凍咗嘅紅酒倒落杯度，等暖番就可以飲。
佢又話，專業啲可以買一啲紅酒加氣套裝，大約1,000蚊，將氬氣打入支紅酒，阻隔紅酒同空氣接觸，再塞番個水松塞，支酒可以保存約一個星期，「一個套裝可以用到幾十支酒。」劉Sir強調，即使啲酒冇晒味，都唔好倒咗去，用嚟煮餸都好好味。
逢周一至周四刊出