比起《色，戒》的梁朝偉，陳志雲今年在娛樂圈更為矚目。由王賢誌炮轟偏私、被杜琪峯鬧騎呢怪、接刀片恐嚇信以及被詹瑞文的舞台劇影射揶揄，是非新聞由年頭帶到年尾、由娛樂版到港聞版，曝光率勁過旗下花旦小生。然而，身經百「箭」的他主持《志雲飯局》卻做得有聲有色，添食再添食；行政工作上，他成功游說政府廢除電視台專利稅，由00年至今為無綫慳足9億；更厲害的是面對尖酸批評也能從容面對：「如果對方係惡意，咁即係想你嬲，你一嬲，咁咪中計？」說陳志雲曝光率太高？其實EQ更高。 撰文：戴彩煥
今年，陳志雲由無綫總經理兼飯局主人搖身一變，成為幾乎全港市民也認識的「明星」，就連崔建邦、王貽興和鄧健泓，也因為被冠以「陳志雲愛將」而成為焦點，人氣飆升。
有人形容陳志雲今年紅過當紅炸子雞，他糾正是最多批評的一年更為正確。
陳志雲日前接受專訪時說：「因為我有兩個身份，一個係對外代表公司，一個係節目主持，曝光率高咗，人哋批評我嘅機會都大咗。」
批評一浪接一浪，言詞一次比一次尖酸，可有覺得hardfeeling？
陳：陳志雲
陳：「真心講，完全冇，因為佢講完出嚟嗰樣嘢，畀我一個空間好好檢討。例如杜琪峯，佢話我唔應該出嚟，話我係騎呢怪，整到個台騎呢台，我真係會諗：我係咪真係出得太多？跟住我就去睇番邊啲可以出少啲，邊啲我唔應該去，雖然傾完之後佢哋（管理層）都話：『你要繼續做。』但起碼同公司有個客觀檢討機會，無論佢目的係好係唔好、善意抑或惡意，最緊要有人提出意見。」
善惡照單全收
那詹瑞文在舞台劇的揶揄影射又如何？
陳：「我都係讀話劇，對話劇創作、舞台劇創作，我好明白，其實我開心㖭！如果我哋節目唔係一個話題，佢就唔會拎嚟做一個主題，做喜劇、趣劇，唔誇大又有乜嘢好笑？如果今日唔係做《萬千師奶賀台慶》，而係做《電視風雲50年》（亞視），我可能仲擔心，變咗你個台都不值一提。聽講有人將我個節目名改做四級片片名《至淫飯局》，其實都係代表一件事，你係一個話題人哋先會講。至於陳志雲問嘅問題係咪低智、係咪放屁，睇過嘅觀眾自有定論。」
與其說陳志雲有個廣闊胸襟，倒不如說他有極高EQ更貼切。
陳：「人哋嘅批評，我首先假設係善意，我將佢講出嚟嘅嘢當係一個好好機會去檢討，如果對方係惡意，咁即係想你嬲，你一嬲，咁咪中計？我冇理由因為人哋嘅錯去懲罰自己，你一動氣嗰下衝上嚟係好辛苦。但如果錯嘅係你，你更加應該感恩，多謝對方指出你嘅錯處，等你可以變得更加叻，所以無論善意或者惡意都唔應該嬲，呢個係我睇得開嘅原因。」
第一階段易哭
今日他能夠看得通看得透，全是日積月累的領悟。陳志雲形容，今日的他是「第二階段」，若是從前，他可能已哭過不知幾多遍。
陳：「我第一階段係：你鬧我啦，我𢭃呢份人工其中一樣嘢就係俾人鬧，你每鬧一句都係畀緊錢我，呢個係第一階段去開導自己。最早階段即係零階段，我會好takeitverypersonal、會好個人，係好難受。以前喺商台係第一階段，畀到我鍛煉。當時香港電台第七台收傳呼機贊助，我同政府投訴，發動報界輿論，結果佢哋以後都唔可以收商業贊助，之後港台發動佢哋朋友嘅專欄口誅筆伐鬧我，鬧得好犀利，連《電影雙周》都鬧埋一份，嗰次我真係喊，我做嘢啫，點解要俾人鬧？後來我開始企喺人哋角度睇，港台咁做，佢哋都係做嘢，各為其主；第二，到今日我都相信公營機構係唔應該收商業贊助，如果你有呢個信念，幾多人鬧你，你都會繼續咁講，基於呢兩點，我就唔應該嬲同傷心。」
切忌恃紅生驕
由一小撮人變成幾乎全港市民也認識的公眾人物，由幕後變成街坊市民不時拉住合照的「明星」，陳志雲說無時無刻都會提醒自己切忌飄飄然。
陳：「有啲機構或者同事特別對你好、特別尊重你，唔係尊重我個人，係尊重我做緊嗰份工，所以他日我唔喺呢個位，10個人裏面有8個唔會理我。同樣，今日好多人認識我、鍾意同我影相，但將來我唔做節目，佢哋唔會對你再咁熱情，呢個係人之常情，所以我不斷提自己唔好覺得自己好巴閉、好叻，否則冇人理你時，你就會好失落。」
靈堂悟出真理
回顧過去一年，陳志雲嘗透被狗仔隊跟蹤偷拍的滋味，深深體會到藝人承受的沉重壓力外，一次又一次出席喪禮，亦令他百般感慨。
陳：「好多個都係有錢人嘅喪禮，好似龔如心咁，佢靈堂用咗好多好靚嘅花佈置，據聞花咗幾百萬，我坐喺靈堂度諗，如果我有好多錢可以用300萬去買花令自己開心，我一定喺我生前做呢件事，如果去咗之後，用幾多錢你都再欣賞唔到，變咗你有財富時要識得享受人生，因為你離開之後一樣嘢都帶唔走……所以更加令到你唔應該動氣，人生苦短，做乜嘢要過得唔開心？人人都可以有佢嘅意見，你知道自己係乜嘢人就得啦。所以有時同朋友講，除咗開唔開心之外，你自信都好緊要，如果你容易受批評打擊你自信，係好唔值得，反而利用批評同抨擊去建立你更大自信、去檢討你有冇改善空間，咁就更加實際。」
踏入08年，單是電視台投入高清服務及北京奧運兩大項目，已肯定令陳志雲忙到氣咳，為此，下月他會放大假到地球另一端的南極旅遊充電，好好享受他一年中最開心快樂的時刻。陳志雲笑說：「希望我唔會污染到南極啦。」
攝影：林德雄
服裝：D'urban
愛恨盡付笑談中
無綫總經理陳志雲07年在娛圈可謂呼風喚雨，更盛傳電視台有以他為首的「雲字派」跟以樂易玲和曾勵珍為首的「樂珍聯盟」大鬥法，他說的每一句話都成為城中熱話，更因其言行出位而招惹事端，但他將一切是非付諸一笑。現在就讓我們重溫圍繞陳志雲的10件事吧！
2月 王貽興 才子得寵
被捧為「才子」的王貽興去年主持節目《最緊要正字》後極速上位，即獲陳志雲力捧，出道未夠一年已先後主持《一網打盡》、《謎》和遊戲節目《最緊要進步》。至於無綫的《萬千星輝賀台慶》，王貽興也有份擔任司儀。
6月 王賢誌 離巢發炮
王賢誌在無綫打滾13年，鬱鬱不得志，離巢後向雜誌大吐苦水，先炮轟陳志雲偏私愛將崔建邦，又批評節目《志雲飯局》有問題，最後還踢爆無綫介紹整容醫生給藝員做手術。陳志雲9月時特別邀請王賢誌擔任《志雲上素》第一集嘉賓，親自煮齋給他下火。
8月 鄧健泓 甜如蜜糖
鄧健泓近年陷事業低潮，曾揚言考慮過跳樓的他，今年8月忽獲陳志雲力捧，先在《兒歌金曲頒獎典禮2007》擔任主持，後被欽點主持人氣節目《味分高下》，令他鹹魚翻生。鄧健泓對陳志雲這伯樂無盡感激，9月時甚至在節目上公開形容他為「蜜糖」，成為一時佳話。
9月 崔建邦 飛躍上位
曾被指與陳志雲關係曖昧的崔建邦，出道4年便獲安排主持《娛樂直播》及《東張西望》，去年更有幸主持台慶，令年資較長的王賢誌意興闌珊，開火炮轟陳志雲偏私。陳志雲有感崔建邦形象受損，遂安排他聯同形象一樣麻麻的梁榮忠和郭羨妮登玉珠峰「洗底」。冰凍過後的崔建邦，即在台慶頒獎禮奪飛躍進步男藝員獎。
9月 兩飯局 一葷一素
陳志雲去年起主持節目《志雲飯局》，邀得城中名人明星接受訪問，在無綫收費電視台播出。由於問題夠尖銳，一針見血，節目贏盡口碑，陳志雲的人氣更如火箭般上升。今年9月，無綫推出節目《開心聊齋》，其中一個環節《志雲上素》便由陳志雲主持，由他去煮出齋菜讓受訪明星品嚐。
10月 陳法拉 雲派愛將
每年無綫台慶頒獎禮舉行前必多是非，有指視帝視后的鬥爭，變成陳志雲的「雲字派」及樂易玲、曾勵珍的「樂珍聯盟」的鬥法，由於陳志雲接受訪問時曾讚陳法拉在劇集《舞動全城》表現出色，隨即有傳陳法拉將擊敗大契李司棋和細契關菊英奪得視后寶座。頒獎禮當晚，視后由李司棋奪得，陳法拉則捧走最佳女配角獎。
10月 詹瑞文 開騷狂鬧
詹瑞文宣傳舞台劇《萬千師奶賀台慶》時扮過陳志雲，後來卻遭無綫封殺，原定他為無綫主持的兒童節目突然被抽起，無綫解釋是他亮相亞視的緣故，但與無綫沒有合約的詹瑞文認為此解釋極度荒謬，轟無綫太霸道。詹瑞文本月在文化中心演出該舞台劇時顯得毫無顧忌，盡情挖苦無綫，更不留情面狂踩陳志雲。
11月 杜琪峯 點名批評
無綫出身的杜琪峯上月出席活動時，忽然開火直指陳志雲是騎呢怪，因而搞出個騎呢台，劇集創意低兼東拼西湊：「堂堂一個總經理，走去做節目，應該諗吓點搞好個電視台，奇奇怪怪，衰啲講句騎呢怪，搞到個電視台係騎呢台。」陳志雲則暗寸阿杜借勢宣傳新片。
11月 遭恐嚇 信件藏刀
今年11月突傳出陳志雲收刀片恐嚇信的消息，信中內容指陳志雲的言論出位及「太寸」，揚言對其不利，但沒有指明是否涉及他所主持的《志雲飯局》，陳志雲得悉即透過TVB報警。
12月 盧海鵬 再玩影射
亞視開拍處境喜劇《十六不搭喜趣來》，找盧海鵬扮「陳志能」來影射陳志雲。盧海鵬當日試造型時先搽厚粉、戴眼鏡、假髮及換上西裝，然後硬谷酒凹，再來招牌蘭花手，造型幾可亂真。陳志雲不介意鵬哥影射他，並說：「我諗我後生啲，不過鵬哥扮嘢係好叻。唔介意，仲可以同我哋宣傳個節目。」盡顯EQ。
公務員變電視揸弗人
年份：1958年
事件：生於香港
年份：1981年
事件：於香港大學畢業，獲頒一級榮譽文學士學位，同年加入香港政府任職政務主任。
年份：1982年
事件：獲政府派往牛津大學深造一年，回港後先後在多個政府部門工作。
年份：1992年
事件：加入香港商業廣播有限公司出任行政助理，翌年擢升為助理總經理。
年份：1994年
事件：加入電視廣播有限公司，出任節目部總監，96年兼任外事部總監。
年份：2002年
事件：獲委任為電視廣播業務助理總經理，04年擢升為電視廣播業務總經理。
資料來源：陳志雲提供