錦興（275）最新半年度純利，等於集團一半市值晒士，價殘抵買。錦興連埋今年發紅股、配股及票據兌換，股數由07年3月底2.5億股，擴大到家陣50億股，市值都係得11億銀。集團單係最新半年度（9月底止），嚟自投資收益大豐收，純利上到5.8億銀，已經相等於市值嘅一半晒士。就算錦興下半年度無進賬，08年度平均PE都係講緊得一兩倍。
錦興股數擴大，但市值細奀，無他，股價由今年5月高位0.74元，跌咗近70%。現價（0.228元）同阿媽德祥（372）約莫年半前，出手增持錦興嘅水位差無幾。當時阿媽出手其中原因之一，相信亦係錦興價殘，遠遠低過NAV。錦興最新NAV貼近0.8元，現價折讓高達71.5%，亦係吸引到痹。錦興現價翻半番到0.34元，預期PE仲係3、4倍，NAV折讓仲超過50%。
寰宇短打值博
寰宇國際（1046）由今年7月0.335元到家陣，跌咗超過60%，又係另一隻跌到殘晒嘅股仔，短打值博率高。寰宇今年6月底手頭現金1.39億銀，長期貸款得6萬蚊咁大把，每股淨現金講緊8.5仙，係現價（0.121元）70%，淨現金水平好吸引。又寰宇最新NAV0.193元，現價折讓37%，近磅媒體股當中，折讓最大股仔係中國星（326），跟住應該到寰宇。短打博寰宇升20%，價見0.145元，未有耐上到NAV水位。
錢雋