左丁山平時鍾意睇體育新聞、球賽評論，但唔知道美國啲體育健筆原來可以搵大錢，恨死隔籬。假如寫中文體育評論都可以搵咁多嘅話，左丁山一定會開闢呢條新財路。
十二月二十六日嘅《國際先驅論壇報》報道話，兩年嚟，雅虎網站與ESPN網站積極聘用體育記者與體育專欄明星作家，以高薪搶人，兩年前，雅虎只有四名體育記者，現在有超過二十人，另加專欄作家。ESPN方面各式各樣體育記者都請（例如功夫、武術），不斷向啲大報挖人。
好耐以來，美國記者從低做起，先在地區報紙掙扎，打出木人巷之後，轉去《洛杉磯時報》、《紐約時報》、《華盛頓郵報》、《USToday》等全國性大報，揚名立萬。記者轉到呢類大報，一生事業到達終點，做到退休咯。點知道，今日互聯網盛行，報紙經營困難，竟然發咗啲體育記者，畀ESPN挖角，上述大報由記者終點站變成記者轉車站，係所有傳媒人都諗唔到嘅。啲大報為咗防止體記/專欄作家外流，唯有盡量加薪，但係ESPN與雅虎體育可以雙倍、三倍加薪咁搶，體育專欄作家與名記者嘅年薪可以去到十五萬至三十萬美元，啲大報唯有舉手投降。
大報畀唔起錢，點解網站可以出手闊綽？皆因ESPN體育網站受歡迎，單在十一月已有二千萬個瀏覽客，而雅虎體育網站有超過二千二百萬個。咁多人睇，衍生廣告收益相信甚為豐厚，故此不惜高薪搶人，ESPN已請咗八十至一百個記者、監製，仲未計有名氣嘅明星專欄作家，例如從SportsIllustrated挖嚟嘅足球評論員──MarkSilver。
相反地，香港報紙銷量一路下跌，而且唔係以體育新聞為主，對體記/專欄作家畀唔起高薪，點夠揮吖。
一位世姪讀書成績一般，但鍾情體育，想話做體育記者，本來左丁山向佢潑冷水嘅，但睇完IHT呢段新聞之後，立即對佢講：「想話做體記，唔該立即磨練好中英文，希望他朝一日，中文體育網站亦有ESPN咁好景，要搵優秀中文體記！」至於左丁山咯喎，有資格在網站寫英超專欄啩？希望有人搵上門。