07/08雙普選夢碎，2012雙普選噚日亦正式被判死刑，人大常委會副秘書長喬曉陽嚟香港宣佈2012年雙普選「死訊」，喬老爺喺首場座談會上忽然搞gag，話喺周末放假日子長篇大論講話不受歡迎，所以好大壓力，希望在場人士鼓掌幫佢減壓，滿堂俊傑即時響起熱烈掌聲。
喺「靈堂」拍手掌，八方都係第一次見，可能對呢班人嚟講，2012雙普選壽終正寢係天大好事，最好開香檳慶祝。噚日朝早2012雙普選喺北京被「處決」後，煲呔開記者會表示歡迎，左報記者一定獲機會提問，最奇係一個冇舉手嘅「新左報」記者都獲欽點，新聞官擺明親疏有別，令人啼笑皆非。