有放過假嗎？好似冇。
趕喉趕命提早收爐為了在東京過個他他條條的平安夜，結果兩星期份量的工作濃縮為6日起貨，「乜都唔使做」才謂之「放假」，但我甚麼都冇做少到，只不過提早做完而已，怎麼算放假呢？但我是香港人，只會把工作唧前唧後做偷位去玩幾天，香港人幾時試過「放假」等於「唔使做」？
如果今個假期太平淡無奇就真係唔抵！好在，踏足日本第一秒鐘已經有事發生！
1.威過拎Chanel
問題：去旅行，怎樣才威得過孭住一個Chanel袋在機場行來行去？
答案：孭住兩個Chanel袋在機場行來行去！
．．．．．．．．．．．．．．．．．．．．．．．．．．．．．．．．．．．．．．．．．．．
在成田機場的入境大隊中，就有這樣的一位富太，嘩！左邊膊頭至腋下足足框了4圈金鏈，因為她同時孭了一大一細兩個Chanel手袋，細的那個脹卜卜，大的那個空「lellel」得半滿，為甚麼不化零為整將個細嘅入埋落個大嘅度呢？因為人人都拎個Chanel袋，她怕得一個唔夠照吧？也虧她度得出這條打孖嚟的絕橋。
大概要等其他不忿氣的小姐阿太看到這一幕，下次同時拎3個Birkin出街，她才會有對手吧！
如果這些港太得到奧斯卡的邀請柬，不知會不會一次過着3條HauteCouture裙（一條喺面兩條打底玩層層叠），再加6抽鑽石鏈行紅地毯呢？
咪住咪住，咁仲有4對Manolo點算？
答案：腳着一對，左右手各穿一對，頭頂頂4隻。
2.迷失東京解救法
問題：在原宿區兜了兩個鐘頭，硬是找不到神宮前3-28-1，點算？
答案：返澀谷，或新宿，坐的士再去一次。
．．．．．．．．．．．．．．．．．．．．．．．．
喂，你話唔係喎，咁做嘥錢事小，戇居事大喎！咁又係，兜個大圈坐的士去到目的地，的確有可能在剛才迷路處一街之隔，但咁亦冇辦法，你知日本街道佈局出名亂×咁來，給你找到了神宮前3丁目第27街區，也不能保證隔籬就是28，極有可能是5，14或33，你以為口在路邊咩？同區之內日日坐鎮三崎菓子店的店員甲都未必指點到你迷津，何況極有可能是自宇都宮縣來的路人乙。如果唔想一上的士就被司機嫌近（因為真係有可能轉個彎就係），不如今日唔搵住，明天在澀谷逛完才截輛有導航設備的計程車，等它將你直接送到門口費事煩。
但記得上網或揭揭雜誌的shoplist，check清楚門牌區域的3組數字，不要像我只是睇《Vogue》報道東京原宿區開了Toga新店，但橫睇掂睇全篇報道就是不提地址，甚至網址，累我在附近逐間「潮店」問人，最後還是無緣看一眼這個華麗太空裝品牌的新總壇。
根據上述「takethelongwayhome」的原理，我也許要回港問問有賣Toga的Shine或HN才能得到正確地址吧。
3.KateMoss的震盪棒
問題：在東京買衫遇到件牌子未聽過但樣子幾好的衫，點決定買唔買？
答案：打出全球時裝精的摩斯密碼，不，「畸摩斯密碼」，問吓售貨員「KateMoss有這個嗎？」，即刻知道使唔使扲荷包。
．．．．．．．．．．．．．．．．．．．．．．．．
去銀座Restir老字號的六本木MidTown新店，在外圍看見兩層高的單位盡用金玻璃包到冚，只在向馬路的一面門有個極容易眼大睇過龍的半掩門口仔，旁邊陰陰濕濕地寫了店名，登時已覺呢間舖頭「有啲嘢」。
入去豁然開朗，裝修固然要整色整水扮有型，燈光卻暗得啱啱好，不會讓你買了炭灰色外套回家搣開雪梨紙才知原來是深紫色的。買手的眼睛也不錯，簡直好像有通靈能力㖭，別人賣Balenciaga的女裝校褸都是入白呀藍呀黑呀紫呀咁，他卻有本事脫離大隊入了件dirtypink的回來。
最邪又最有趣的事，男女裝之外，他們還特地闢了一角賣情趣用品，當然是topoftheline的，例如喱士織得最複雜的胸圍底褲、用最軟熟的小羊皮做的皮鞭與腰封、真絲的眼罩、白金鑲鑽的孖葉……還有幾支雪茄size的vibrator，滑溜的精鋼外殼，配metallic的金、銀、灰、紅、紫。店員見我們駐足觀看良久，不忘在耳邊細細聲補了句「KateMosshasittoo！」你係咪即刻好想買呢？
Restir在東京六本木MidTownGalleria1/F。他們也和東京的Loveless與L'Eclaireur一樣，只要你幫襯，即使只是三嚿水的T恤，也會突然有個穿白恤衫黑圍裙的侍應捧着個drinklist出現問你要乜，實行請你在過億日圓裝修的店面中，開張梳化卡座請你飲杯嘢，虛榮的滿足程度和同時孭兩個Chanel袋有得揮。
4.乘匹茲堡號去Shopping
問題：由新宿去澀谷，坐乜交通工具去最豪？
答案：飛船！
．．．．．．．．．．．．．．．．．．．．．．．．
就是有個欖形氫氣球吊住個cabin的「匹茲堡號微型版」，載滿都只得10名乘客，專門提供東京購物區的低飛觀覽服務，但每人每次飛一小時收費過萬港元，我重組句子：但每人每次飛一小時收費過萬，講完！
5.呢本書嚟㗎？
問題：點解呢本日本雜誌要俾泰國炒金邊粉個蛋網包住？
答案：因為佢似香港啲雜誌有BookB,C,D,E,F加無謂贈品，普通橡筋已經hold佢唔住。
．．．．．．．．．．．．．．．．．．．．．．．．．．．．．．
咁情況繼續落去，我相信唔使幾耐，本本雜誌都會連轆出售。
如果我再寫落去，我就有份令呢件事發生，所以今日就此打住。
本周多嘴
問題：Viktor&Rolf為Piper-HeidsieckRos囗設計的倒立香檳樽，英國HarveyNichols、法國Coleet甚至網路上的wesoldout.com火速售完，你估吓我最後搵到去邊度先買到？
答案：香港機場的免稅品店。
．．．．．．．．．．．．．．．．．．．．．．．．．．．．．．
直到東京的時裝大店ViaBusStop，才發現原來有個配成一套的upsidedown香檳桶，但只display不賣，好想要之餘，也不得不讚只有日本人才認真得這樣做戲做全套。
更寸的是，在MidTown分店他們還長期開定支人人都只會買來觀賞收藏的限量版請客飲呢！
有錢不是大晒，懂得找好貨來買先算叻，買到好貨又用得有型！頂！頂級的頂！
Textby黃偉文
