如果台灣人說自己出了一個李安導演，10個香港人有9個都會推出王家衛來反擊。毫無疑問王家衛已經成為香港的品牌，一個地道的出品，比起李安滲着的一股洋味有所不同。
王家衛講過做一個導演要有耐性及堅持，做他的觀眾亦要有相同的信念。如果你捱過這個時光而又未昏昏入睡，大抵你會慢慢融入跟梁朝偉及張曼玉一齊穿梭於那個不再存在的時代。當然不是人人做得到，正如王家衛所言「個個做到，就唔使你做（導演）啦」，急功近利的香港人做他的戲迷不是那麼容易。 撰文、攝影：何永寧
那個時代已過去，屬於那個時代的一切都不存在了。——劉以鬯小說《對倒》
曾經是王家衛在電影《花樣年華》中引用的名句。時光不復再，透過光影美學及王導演講故事的本領，那個時代又再浮現在銀幕。變成一系列充滿懷舊色彩的藝術電影，令欣賞王家衛的電影人趨之若鶩，大有一股王學的興起；不喜歡的卻嗤之以鼻。
大原則
別樹一格 讓市場定位
對於被封為藝術片導演，王家衛的答案很出人意表，他笑說：「我唔係藝術片導演，係一個商業導演而且係不太成功嘅商業片導演。」他補充說：「其實電影本身冇商業同藝術之分，屬於乜嘢類型係由市場決定。好似一杯咖啡喺半島（酒店）賣同喺Starbucks賣冇影響杯咖啡本身，問題係你想喺邊度飲。其實拍出嚟嘅電影屬邊類型，你唔係有好多選擇，你嘅手拍出嘅就係咁樣。例如我第一部電影《旺角卡門》，如果你畀林嶺東同徐克拍可以係另一個古仔，畀王晶拍又可以係另一個古仔。每人嘅手法唔同，拍得多之後咪開始了解，哦！原來我拍出嚟係咁嘅，就成為你嘅風格。當然有啲嘢淨係你可以做到，因為如果人人做到就唔使你去做啦，最緊要係要有一個理由你點解要咁做。」
遭誤解
度期困難 快慢不由人
由1988年的《旺角卡門》到夥拍荷李活影星祖廸羅（JudeLaw）拍攝的近作《藍莓之夜》（MyBlueberryNights），及即將和影后妮歌潔曼（NicoleKidman）合作的《上海來的女人》（TheLadyfromShanghai），王家衛又如何看待成功之道，他說：「《藍莓之夜》唔係荷李活片，只不過係喺美國拍嘅香港片。好多人話『嘩！你闖入荷李活喎』我唔係咁睇，只不過到某一階段我哋有啲合作，呢個世界越來越細，合作嘅機會會越嚟越多。而且我唔覺得我成功，做導演要有耐性，你有一個諗法堅持做落去就可以。」
但王家衛的堅持及信念曾經令《2046》拍了4年，更有多事之徒謔言要到2046才能看到該片完成，王導演曾公開為此不快，他解釋說：「人哋對我嘅誤解冇乜嘢好埋怨。唔高興係因為呢啲說話係出自行內人嘅口，身為同行應該明白拍攝嘅困難。《2046》唔係拍得耐，係等待嘅時間耐，因為要等齊10個演員。好似木村拓哉一年得幾日係得嘅，又要搭景等，有啲戲係需要時間。而且我唔係前期做得好好嗰種導演，我要做埋編導，所以好多時拍緊嘅時候我已經改緊（劇本），由《旺角卡門》到𠵱家都係咁。我話過如果人人做到就唔使我做啦。」
王家衛笑言片拍得耐並不是他的宣傳手法，因為就算一部電影拍上10年光景假如不好看，對觀眾來講是沒有意思的。他補充其實作品中《重慶森林》跟這套《藍莓之夜》亦只花了兩個月左右便完成。
論對手
李安成功 模式不一樣
台灣導演李安在《色，戒》起用梁朝偉獲得成功，同樣視偉仔為首選演員的王家衛，很自然會給人拿作比較，王家衛很大方的說：「我同李安導演喺風格上係好唔相同嘅導演，喺兩個唔同創作空間同制度下工作。佢嘅基地喺美國，有好多人替佢寫劇本畀佢選。我自己就DIY，係唔同工作模式，一睇就知完全唔一樣。」
王家衛更補充雖然自己曾嘗試拍攝不同種類的電影，但有一種一定不會試，他笑說：「恐怖片，細路仔俾媽咪成日帶去睇嚇得太多，我相信我拍嘅一定好恐怖，但唔想下一代經歷我細時嘅痛苦，所以一定唔拍。」
大導眼中的巨星
跟王家衛合作過的紅星不計其數，單是一套《阿飛正傳》便雲集多位紅星，梁朝偉、張曼玉、劉嘉玲、劉德華、張國榮等，每人都是當時得令的影帝、影后級人馬。在王導演眼中跟他合作過的演員都各有特色：
鞏俐演技功力深厚
「鞏俐係一個好強嘅內地演員，《2046》有個鏡頭講佢同偉仔分手，佢可以演到我叫唔到cut，杜可風亦都拍到冇晒菲林片，一套菲林有成10分鐘，佢嘅功力有幾深厚可想而知。」
劉德華演反派好好睇
「劉德華係一個好勤力嘅演員，大家對佢演嘅戲都會有要求。當年佢拍江湖片成功，幫佢開咗一條路，亦都證明咗佢嘅實力。我一直覺得佢嘅可塑性好高，一啲內斂嘅角色好適合佢發揮，《無間道》證明咗呢點，其實佢演反派會好好睇。」
劉嘉玲封后實至名歸
「劉嘉玲啱啱（憑《好奇害死貓》）做咗金雞百花影后，其實佢應該更早得到呢個榮譽。同劉嘉玲合作咁耐，見到佢不斷成熟，對角色嘅摸索越來越到家。我相信劉嘉玲成為影后係實力嚟嘅，同外界講嘅其他所謂嘅原因係冇關。」
張國榮無論演乜都好
「張國榮係一個明星，有一類演員無論佢演乜嘢都好，都會係佢自己，張國榮同林青霞都係屬於呢類演員。作為演員我唔覺得係一種悲哀，因為佢係嗰段時間嘅一個icon（典範）。」
梁朝偉亞洲最佳演員
「偉仔可以話係亞洲最好嘅演員，喺外國大家都知佢係邊個。偉仔目前處於最成熟嘅黃金時期，《色，戒》嘅易先生佢發揮得淋漓盡致。事實上佢唔係第一次演反派，基本上《花樣年華》佢嘅角色周慕雲都係反派，追張曼玉都係出於報復。」
張曼玉肢體語言出色
「張曼玉（Maggie）由人哋講嘅花瓶到今時嘅影后，佢下過好多苦功。初出道佢好冇自信，經過一部又一部戲嘅磨練卒之有今日嘅成就。我同Maggie講過佢本身嘅肢體語言好好，就算喺度行嚟行去，效果好過講10句台詞。」
章子怡唔會畀你睇死
「拍《2046》有幕講章子怡同偉仔喺餐廳對話，先要佢喊再要佢笑，咁我話『如果要你喊完笑之後再喊得唔得呀』，佢依然可以做到喎。就係呢種唔會畀你睇死嘅心態，令佢越迫越有。內地演員一般都好強，前提係作為導演你要令佢信服。」
