理大學生會早前俾中聯辦利誘，雙方合作搞交流團去上海，被指違反對中共不承認、不溝通、不妥協「三不政策」，噚日終於撥亂反正，表示已同中聯辦講清楚，一日未平反六四，學生會都繼續「三不政策」，所以下個月出發去上海、南京個文物保育交流團，唔使中聯辦安排同官方單位見面，學生會亦唔會見人大常委。
俾人抦完終頓悟
理大學生會會長余耀東同八方講，團員唔會同任何中共官員有任何官式或非官式接觸，總之六四未平反，萬事休提。理大學生會態度忽然急轉彎由軟變硬，係因為《蘋果》踢爆佢哋違反「三不政策」後，引起好多學生會老鬼不滿，更驚動埋支聯會，因為理大學生會係支聯會創會成員，「勾搭」中共等同犯天條，好多人大鬧學生會冇腰骨。
支聯會新常委、學聯秘書長李耀基好關注呢件事，早前向理大學生會曉以大義，提醒佢哋有責任遵守「三不政策」，有機會返內地，應該旗幟鮮明要求平反六四、爭取民主。俾人抦完，理大學生會頓悟．噚日更發聲明強調會繼續每年舉行六四悼念晚會、活動同遊行。