明年台灣總統選舉萬眾矚目，小馬哥肯定會同謝長廷惡鬥連場，連佢喺香港班粉絲都已經動員起來，成立香港馬英九之友會，希望發動居港台灣選民明年3月22日坐飛機，拉隊返台灣投票，等馬英九順利「當蒜」。
香港馬英九之友會噚晚喺紅磡某大酒樓筵開50席，場內掛滿青天白日滿地紅旗仔。同國民黨關係密切嘅會長鄔曉鋒估計，香港有四至五萬人因曾當兵、升學而落籍台灣，又或者係嫁咗嚟香港或喺香港打工做生意，佢哋希望幫呢批人去中華旅行社申請補辦台灣護照，再登記做選民，到時去台灣投票畀馬英九。八方睇見呢個會有個叫劉泰嘅副主任委員，佢咪係前排參加港島區補選嘅柳玉成囉。