長沙灣網友葉先生推介周四上市半新股興業銅業（505），佢話：「近呢幾個禮拜，半新股表現唔錯，好似中國中鐵（390）同中材股份（1893）股價都有理想升幅，自己都有買到中鐵，有啲斬獲，所以考慮現價高追興業銅業。」
興業銅業噚日繼續造好，股價最多升五成，曾高見4.95蚊，收報4.55蚊，升38%，掛牌兩日，股價較招股價累升近1.7倍。至於另外兩隻半新股中鐵及中材股份，升幅亦相當凌厲，現價較招股價分別累升93%及1.3倍。
再升空間有限
亨達集團研究部董事黃敏碩表示：「近排市況氣氛唔好，唔少新股都唔敢定價太高，興業銅業就以下限定價，吸引投資者追落後。現時興業銅業已累積相當升幅，市盈率在短短兩日由6倍急升至19倍，相信再升空間有限，唔建議喺現價再高追。」
孫柏文指：「興業銅業經營高精度銅板帶，係中下游業務嘅工業股，投資入場門檻唔高，行業面對唔少競爭，投資前景冇政策股中鐵咁好，對投資興業銅業有保留。」黃敏碩亦話：「興業銅業未去到吸引大行入貨嘅級數。」
葉先生仲揸住中石油（857），佢話：「十七個幾高追中石油，𠵱家坐緊艇，唔知點睇。」黃敏碩話：「中石油嘅股價追唔追得番上去，要睇業務發展，同埋未來盈利增長。」
就嚟踏入新一年，葉先生問：「嚟緊08年，有邊類股票會較吸引？」黃敏碩睇好內需股，而受負利率刺激，上半年本港地產股亦可考慮。
阿里巴巴（1688）
科網熱料重臨
灣仔陳生推薦阿里巴巴（1688），佢身體力行27蚊買入，目標價35蚊，24至25蚊止蝕，揸3個月。對於阿里巴巴，黃敏碩認為唔需要重注，反而建議騰訊（700），因為股價較低，而且蟹貨較少。黃敏碩話：「好多散戶見到阿里巴巴好似『鐵股』，似升不跌咁，喺高位追捧。𠵱家睇番，阿里巴巴困住喺10天同20天平均線上，短期有機會借勢上返29、30蚊，但再上望可能只會橫行，因為股值唔平，之前係炒貨源歸邊。雖然股值貴唔一定會暴跌，但要用時間消耗番。」
陳生堅持買阿里巴巴係因為：「出年都係炒科技科網為主題，喺香港冇乜可以買，可以話係『焗賭』。」佢更問如果睇好科網股，喺中港有乜其他選擇，孫柏文揀百度，黃敏碩話可以考慮騰訊。
對科網股情有獨鍾，至於一致看好的地產股，陳生則非常看淡，佢形容：「地產死梗，本港地產股等於一個三角形，得幾隻大股吊住喺triangle最高嗰點，跟住下面成堆垃圾。」陳生炒股十年，做金融業，佢有感而發呼籲，「散戶千祈唔好買窩輪，我喺美國做嘢時都有人complain窩輪係一個unfairgame。」
遠洋地產（3377）
有背景博注資
大埔股神牙醫建議買遠洋地產（3377），佢喺今個月中以10.08蚊買入，目標價睇15蚊，揸半年，止蝕價8蚊。孫柏文話：「冇記錯15蚊係佢上市之後最高位。」至於股神牙醫推介原因，「因為佢大把地未發展。」對於股神牙醫嘅睇好理由，孫柏文質疑，「近排好多大陸地產股受壓，原因大家都知，有乜理據支持你所講，佢嘅股價並未反映多地呢個因素？」
股神牙醫話：「早排隻明星股碧桂園（2007）冇得郁啦，俾人查緊，所以應該到佢（遠洋地產）炒上。」黃敏碩覺得今次股神牙醫選擇不錯，「碧桂園點解股價下沉，相比之下遠洋地產好少少，因素不在於買地。我炒內房股有個新投資法，第一遠洋有注資概念，遠洋地產母公司喺國內有背景，投地取向會正面啲，唔好似碧桂園咁，因為佢係民企，投地好多時用自己私底下嘅方法，遠洋相對俾人詬病嘅情況低少少。另外，遠洋地產係國有背景，注地時會比較體貼，會注入優質地皮或者以相宜一啲嘅價錢注地。」
既然睇好遠洋地產，股神牙醫問是否應該加注，黃敏碩對此有保留，亦認為15蚊目標價過高，因為尚有政策會出台，相信內房股仍存有變數。
維達國際（3331）
大行唱好 網友睇5蚊
西貢Michael推介今年上市嘅維達國際（3331），因為股價喺高位回落後，近期陸續有大行發表研究報告推介，加上公司下半年調整產品售價，𠵱家睇緊有冇機會可以趁低吸納，目標係3個月內可以上到5蚊。
黃敏碩話：「維達早前因為公佈嘅中期業績表現一般，拖累股價低沉咗一段時間。近期市場炒內需股，炒完鞋類股份之後，𠵱家市場搵緊其他內需股炒，喺呢個概念下，維達股價今日反彈，收喺10天同20天平均線上，如果未來能夠企穩喺50天平均線，目前企穩喺4蚊水位，表現應該好啲。」
不過，黃敏碩提醒Michael，如果睇維達圖表走勢，升到4蚊水平應該冇問題，但是否再有上升動力，或再獲機構投資者歡心，仍是未知數。所以佢建議Michael可以等多一陣，或者等下一次集團公佈業績，先至決定亦未遲。
下周一嘉賓：法國巴黎銀行零售衍生產品部董事翁世權
周一收市後1:00pm
歡迎Phonein28698262
http://appleactionews.com/features/finance/
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
＊下星期一港股開半日市，節目提早下午1時開始，12時優先接受登記
