加套Mugen包圍<br>車仔變跑車

加套Mugen包圍
車仔變跑車

如果你係Honda嘅DieHardFans，實知Jazz曾經推出過加咗包圍嘅HEVersion，同埋座椅繡花嘅SHEVersion，大玩男女版噱頭，加上超低耗油，一登場就好受歡迎；代理再接再厲，推出Jazz原廠Mugen包圍特別版，令呢部本來斯文到極嘅車仔，登時變臉成有型有格嘅跑版！

記者：梁美甜
攝影：周旭文
模特兒：Ivy

原廠Mugen包圍型得起

要數受香港車迷追捧嘅細車，相信Jazz必在三甲之列，究其原因不外乎係車仔細細、外形可塑性高，可愛又得、惡形惡相又得，盡得潮人歡心；性能以車仔嚟講，夠力跑得之餘仲非常慳油，最得人心嘅就係佢車身細但空間感十足，置物位多超實用，所以Jazz喺二手市場亦相當搶手。
最近代理再幫Jazz引入原廠Mugen包圍版，加咗網紋鬼面罩、前後泵把、兩側裙邊、尾翼同尾喉加裝喉套等等，令呢部車仔即時變得有型又夠霸氣，最正嘅仲要係部車係紅色，第一眼望落去已經贏晒啦！

$134,880

a.鬼面罩用上原廠網紋款式，搭埋頭泵把，型！

b.15吋胎軨好有跑格，猶如暗示Jazz跑得兼好彎之特性。

c.全車包圍又點少得兩側裙邊，立體感甚強。

d.現時大部份車款側鏡都加有指揮燈，Jazz亦唔例外。

的骰實用性能兼備

近年，好多人買車都以實用為主，因而造就Jazz大行其道；事關家陣油價高，Jazz得嗰1,300c.c.，慳油又慳錢，加上香港地人多車多，佢細細部夠的骰，捐窿捐罅點走都得，泊位又易，新牌仔都舞得掂！出名內櫳闊落嘅Jazz，實用性更毋庸置疑，頭頂空間夠之餘，尾廂本身容積已經擺得落幾件手提行李，嫌唔夠仲可以放平後排座椅，隨時連三座位梳化都放得落，不過要坐少兩至三個人……趕潮流學人玩改裝或個人化嘅，咪自己改裝囉，橫豎Jazz由外形至內櫳都有咁多空間發揮；新版加埋原廠Mugen包圍㖭，外形已經贏晒，佢副偈亦配有直接雙重點火系統（i-DSI），無咁易死火同壞之餘，最大馬力輸出更可以去到86匹，兼且仲可以喺引擎處於2,800rpm時輸出12.1kgm扭力，細車嚟講算好夠力水囉！