過埋下星期一除夕夜，做咗市建局行政總監六年嘅林中麟就會正式起身鬆人。回顧過去工作，林中麟話有笑、有淚，笑就梗係早幾年樓市低迷時收樓，樓市高峯時出貨賺大錢；淚就梗係收樓時遇到阻滯，好似波鞋街同利東街咁。不過，林中麟話除咗有笑、有淚，仲有個驚字，因為曾經有重建戶不滿賠償，拎把菜刀去市建局找晦氣，好彩最終俾職員勸服，冇發生血染市建局慘劇。
政府未公佈林中麟繼任人，江湖傳聞領匯前行政總裁蘇慶和、屋宇署前署長鄔滿海同地政總署前署長劉勵超都係人選，八方收到料話接替呢個年薪逾400萬肥缺者另有其人。八方建議由獲煲呔盛讚「好打得」嘅發展局局長林鄭兼任，慳番一大筆錢。