英超聯每年一度嘅聖誕新年快車已近尾聲，截至拆禮物日止，可能係全季最戲劇化，最扣人心弦嘅一場球賽就係車路士對阿士東維拉。所有觀眾都事先估唔到嘅係上半場踢到第四十五分鐘，維拉竟然領先二比零，大有可能打破車路士主場連續七十一場不敗嘅紀錄。點知峯迴路轉，第四十七分鐘維拉中堅禮特在龍門口三碼推低波歷克，被趕出場，舒夫真高射十二碼追番一球，大家都諗住下半場車仔以十一個打十個，可以追番有突啦，點會諗到車仔反勝三比二之後，被追和三比三，第八十幾分鐘波歷克射入靚罰球，補時之後，竟又被罰十二碼，結果打成四比四。
呢場球賽精彩之處在於（一）車仔嘅世界級門將Cech竟會彈琵琶送球入網益維拉；（二）車仔先以十一人對十人，繼而十人對十人，最後九人對十人，雙方共有三個紅牌，打到皮開肉裂；（三）舒夫真高與波歷克翻生，各自射入一球世界波；（四）維拉雙翼係英格蘭青年軍，速度奇快，威脅力甚高，有資格入選大國腳；（五）波歷克因林柏特傷患至有機會出場，打出身價波，證明佢係好有價值球員，前車仔領隊摩連奴唔將波歷克列入歐冠盃球員，車仔現在後悔莫及咯，而舒夫真高咁醒，一月份會唔會捨得畀佢轉會返莫斯科呢？
車仔和波，阿仙奴和波，曼聯大勝新特蘭以四十五分領先英超，應該係熱門冠軍人馬，車仔與利物浦只係爭第三第四名，但老實講，如果場場波都係曼聯贏四比零嘅話，英超聯就冇咁好睇咯，假設每個星期都有一場類似車仔大戰維拉，戰成四比四嘅球賽，全球觀眾肯定為英超聯瘋狂。
適逢now合約到期，營銷員打電話嚟講要加價一百元，每月全餐由三百八十八元加到四百八十八，加價理由就係有英超聯獨家直播。冇法子啦，睇完車仔對維拉，唯有繼續磅水。BBC新聞話中國本來有三千萬英超聯觀眾，點知廣東WinTV今季得到英超轉播權後，每年向訂戶收五百八十八元人民幣，肯交月費嘅只有二萬名，其他中國觀眾冇免費台睇波，一於關人，搞到WinTV唔知點算好，大佬呀，佢嘅三年轉播權費要畀五千萬美元，蝕死未得天光也！