黨員個個身家厚嘅自由黨號稱富貴黨，其實香港真正富貴嘅政黨係民建聯，呢個多草根支持者嘅政黨正一禾稈冚珍珠，月前一次過掃咗兩層價值3,640萬元嘅商廈做黨總部，係香港唯一有自置物業做大本營嘅政黨，可見佢哋「水頭」幾咁充足，其他黨派相形見絀。
民建聯原本租用炮台山聯合出版大廈12樓做總部，由於黨員數目已過萬，地方越來越唔見使，所以過去一年密謀搬竇，咁啱同一幢大廈15、16樓放售，佢哋就決定置業，連掃兩層連兩個車位，總樓面面積達11,000幾平方呎，成交價3,640萬元，平均呎價大約3,200蚊，同區內商廈近期成交價差唔多。
兩層打通設旋轉樓梯
根據資料，呢單交易喺今年8月初落定，由司庫黃建源同副主席葉國謙簽臨時買賣契，即係民建聯已故主席馬力病逝前正式扑槌買樓；由於馬力生前主張搬新總部，呢次買樓都算圓咗佢遺願。民建聯買樓搵中銀做按揭，據講畀咗過百萬元首期，日後要個個月供樓，不過佢哋後台硬淨，又有成千萬元儲備，慳番租金用嚟供樓應該綽綽有餘。
上屋搬下屋，唔見一籮穀，民建聯下屋搬上屋都好大工程，職員、物資要分批運送，噚日終於搬得七七八八，仲擇咗中午12點吉時喺15樓切燒豬，希望開工大吉。八方噚日上過民建聯新總部，發現裝修陳設豪華程度係各政黨之冠，副主席葉國謙唔肯透露使咗幾多錢裝修，「總之價錢合理。」
葉國謙話15樓係職員辦公地方，佢都係坐呢層，由於多機密資料，所以閒人免進，16樓就主要用作開會，有個記者室同大會議室，最多可同時容納200人，亦有地方畀黨員傾密偈同會客室，黨主席譚耀宗間房位於呢層，不過譚耀宗未正式「入伙」，得間「吉」房。為方便職員上落兩層樓，民建聯特別打通部份樓面安裝旋轉樓梯，不過條新樓梯仍未竣工，遲啲先啓用。
外國政黨有黨產、黨營事業，香港政黨喺呢方面有排學，除咗民建聯「得天獨厚」每年籌到幾千萬經費外，其他政黨都捉襟見肘，冇乜閒錢剩，日後選舉點同民建聯鬥！