前名嘴黃毓民擔大旗嘅社民連，由於租用江湖猛人「鬼添」李育添尖沙嘴金巴利道嘅物業做總部，搞到內訌。副主席兼出位醫生勞永樂噚晚突然發出新聞稿，宣佈要辭職兼夾要脫離呢個組織。
勞永樂噚晚將近12點發出新聞稿，話作為一個政治組織，並且參與各級議會選舉，有責任保持最高道德標準，而且要言行一致，向公眾展示有誠信同道德操守。又話，有感喺呢方面嘅基本價值出現嚴重分歧，佢決定即時起，辭去社民連所有職銜同會員資格。今日係香港民主發展好重要嘅一日，作為泛民一分子，勞永樂喺呢個時候作出咁嘅決定，八方但願，勞醫生唔好氣餒，繼續為香港民主打拼。