男友致電：「已經等咗你3年又3年，仲有幾耐先至出得門口㗎？」
女友回答：「畀多30分鐘啦，襯埋件衫我就落嚟！」
買衫容易襯衫難，呢種情況未必一定發生喺女人身上，假如每日有「NelNel」（張學潤）做衣櫃裏的男人，教你襯衫兼提供專業意見，你話幾好呢！PSP將推出《MyStylist》，只要利用PSPCam影低心水服飾，便可即時獲得襯衫結果和專家意見，唔使𢱑晒頭！
記者：陳國輝
攝影：梁細權
Model：Cody
Ball場宴會唔少得
把《MyStylist》說成是一隻PSP遊戲，似乎唔多恰當，反而將其視作為一件襯衫工具就比較適合。佢最強分唇之一係「StyleBook（造型書）」，喺入面你可以幫自己任意配搭唔同種類衣物，仲包埋頭飾、首飾、手袋及眼鏡等。假如你已經用PSPCam影低埋自己嘅全身Look，仲可以Preview到穿上服飾後嘅感覺，都幾真實㗎！但真實都要付出代價，當每次拍低一件新衫，仲要同時記錄靚衫所穿着嘅季節、使用物料、價錢、色彩等碎濕濕資料，十足填問卷咁款，勁嘥時間！不過對成櫃衫嘅玩家嚟講，都算有用。
另一不得不提嘅係「Calendar（月曆）」功能，咪以為只能夠記事，實情最大用途係為你每日配搭不同嘅造型。玩家可Set作每日或每月顯示，選定某日子後，就可以到「衣櫃」揀衫，慢慢試、逐件襯，唔想諗嘅話可選擇「AutoStyling」，等專家幫你揀，假如經常出席Ball場或其他宴會，「Calendar」功能必定好啱你。
襯衫逐格睇
評估拍拖出街相襯度
如果幫自己襯衫都未夠喉，《MyStylist》亦提供兩性相襯程度評估，意思係除咗為自己，仲可以幫一齊出街嘅Partner襯衫，然後由專家評估你哋嘅分數，並提供改善建議，聽落都幾好笑！但玩過先知原來好認真，喺兩性揀衫過程上，一樣要詳細填寫服飾資料，尤其顏色對評估嘅影響最大，如果你喺呢方面一無所知，不妨去「換穿檢定區」、「個人色彩診斷」及「時尚辭典」惡補吓，學曉色彩選擇及遮掩缺點嘅技巧，對你襯衫有極大幫助。
DIY戰衣工房
《MyStylist》最強之處係可以變成一個超級大衣櫃。只要有PSPCam跟身，玩家就可以將衫、褲、鞋、襪，甚至冷帽、頸巾等不同衣物收納到PSP的MemoryStickPRODuo內，並分門別類自製成服裝Database。另據開發商表示，各大時裝品牌於將來亦可能提供來季多款潮衣潮物圖片畀大家單撈落PSP，咁第時唔使着上身就可以襯衫，真係方便到極！
Step1
為靚衫拍攝之前，記得將衣物整齊平放。
Step2
PSPCam能夠180°旋轉，可慢慢調校至最適合角度（最理想角度為鏡頭與機身垂直作平面拍攝）。
Step3
當靚衫對準畫面上的框框，便可放心按下「R」鍵進行拍攝。
Step4
影完之後會出現一幅效果圖，如不滿意可隨時嚟過。
Step5
拍攝完仲要為靚衫逐件填上物料、色彩、價錢等資料。
PROFILE
遊戲名稱：《MyStylist》
機種：PSP
開發商：SCEWWSJAPANStudio
類別：襯衣工具
人數：1人
語言：繁體中文
推出日期：08年2月
售價：待定
