獎可以亂頒，但唔應該隨便攞，新城電台「分豬肉式」頒獎有辦你睇，特區政府東施效顰頒嗰啲乜鬼嘢紫荊勳章，土共左仔通通有份亦越嚟越唔矜貴，喺香港人心目中，始終係「契媽」頒嘅「荷蘭水蓋」最馨香，英女皇元旦授勳名單噚日出爐，中國會、上海灘創辦人鄧永鏘DavidTang榜上有名，係唯一一個獲勳銜港人。
「蛇」（Sir）David同八方講，好榮幸獲英女皇頒發KBE勳銜，顯示佢過去十幾廿年促進中、英關係嘅工作得到肯定。
根據英國政府公佈，頒KBE畀鄧永鏘係表揚佢喺英國慈善服務同促進港、英關係貢獻。鄧永鏘早前自爆，89年六四事件後，佢同徐展堂秘密約見當時英國首相馬卓安（JohnMajor），成功游說佢去北京見李鵬，落實興建新機場嘅千億「玫瑰園計劃」。
爵位高阿爺一級
鄧永鏘話今次晉爵，唔單止為港爭光，亦係佢家族莫大光榮，因為佢已故爺爺鄧肇堅都係爵士，相信香港望族之中，得鄧家咁威水有兩個爵士。佢又話阿爺在生時好巴閉，出出入入都有人鞠躬敬禮叫鄧爵士，好多人以為爵士係世襲制，後來見到佢都叫「鄧爵士」，佢耍手擰頭，事關鄧爵士已過身，亂咁叫真係大吉利是，𠵱家就名正言順嘞，「我係KBE，我阿爺係Kt，爵位低我一級。」
一門雙傑十分罕有，鄧永鏘話𠵱家佢個仔可能壓力好大，屋企有兩個爵士，真係唔可以行差踏錯有辱家門，至於想唔想個仔都做爵士，佢話太長遠嘞，唔諗得咁多。英女皇出年初會正式頒發勳銜，屆時佢一定親自去白金漢宮接受殊榮。
鄧永鏘長袖善舞，同特首煲呔曾都有交情，唔知日後有冇機會攞紫荊勳章，不過佢曾表示，特區勳銜始終差一皮，因為紫荊勳章只由特首喺禮賓府頒發，應該改喺人民大會堂由國家主席胡錦濤或總理溫家寶頒發先顯得高人一等。
鄧永鏘𠵱家逢星期日喺《蘋果》寫英文專欄〈TheworldinwhichIlive一人世界〉，八方有個爵士鄰居，與有榮焉。