社民連成員羅就成功闖關抵達北京，噚日開始上訪活動，由於人生路不熟，要靠記者教路先成功去到國家信訪局遞交畀人大委員長吳邦國嘅請願信，由於社民連預備嘅請願信同2,000幾個市民簽名俾深圳公安充公，羅就要即場寫過，急就章就地取材，只可以用佢下榻嗰間城市青年酒店信紙寫請願信。
羅就帶咗7,000幾蚊上京，買完機票剩低3,000幾蚊，酒店房租每晚200幾蚊人仔，佢唔敢亂使錢，初時唔捨得買手套保暖，問食肆攞勞工手套頂住就算，後尾冇人畀佢，惟有花錢買。有啲錢係唔慳得，佢喺北京搵地方買整banner材料，今日去人大常委會會場抗議，又一度想趁機「保釣」，向訪華日本首相福田康夫請願，考慮後唔想節外生枝作罷。羅就難得抵京，民主派大可委任佢為「駐京上訪專員」，方便日後隨時請願。