近期兩隻新股王表現可人，中材股份（1893）及中鐵（390）上市以來都有不俗升幅，不過真正帶起新股狂炒熱潮，應該係名不見經傳嘅興業銅業（505），繼首日掛牌勁升93%之後，噚日續升38%，而且成交有成16億銀，為全日第9大成交股份。另一方面，其市值只係27億銀，反映昨日轉手比率非常之高。該股主要從事加工生產銅板帶，嚴格嚟講只係增值能力唔高嘅工業股，炒唔炒得過真係見仁見智。
其他新股幾乎全部大幅炒上，另一狂炒新股係安東油田（3337），升咗30%，成交有8.3億銀，拍得住興業。安東係首間來港上市之內地民營油田服務供應商，由於在新股黑暗期招股，故此雖錄得15倍超額認購及以近下限定價，首日掛牌仍要潛水。
油井服務大幅增長
作為內地最大民營陸上油田服務供應商，安東的4大業務包括鑽井服務、油井服務、採油服務及基地服務，其86%的收益，來自中石油（857）、中石化（386）及中海油（883）3大內地石油巨企，收入極有保證。由於中國目前仍非常依賴原油進口，中國政府鼓勵中石油等公司繼續增加油田勘探及開發，以提高產量，這亦間接推動油田服務需求，據估計，中國油田服務的市場規模，將由去年的2000億元，倍增至2010年的4000億元，安東自然受惠。
另外，安東的油井服務去年僅佔營業額的7%，至今年上半年，部門引進多項新服務後，業務收入隨即按年飆升3.5倍至1.74億元，佔營業額的比重，亦一下子躍升至47.5%，成為未來主要的增長動力。所謂油井服務，即透過高端的壓裂及酸化服務、防砂及固井等提高產能及油井壽命。以此股的增長能力，若在旺市時招股，隨時可以2.40元上限定價，昨收2.55元，高唔過上限價好多，若見回調值得低吸。