自從貽興王跳進公仔箱，掀起一陣正字熱，但既然中文字多如繁星，總有漏網之魚；政府官方字彙特意收錄，香港人最常用嗰5道門呢，全部錯晒！「小狗」等等，唔應該開門，5道門正字為「尸」字部！
上周四於銅鑼灣新開的商場，彩虹色「DelayNoMall」大剌剌高高掛，中英讀音差之毫釐，意思謬以千里；行行吓街，居然又撞到「福建大學」學生，佢着件莊員Tee，係「料理農務系」的學生！件件Case，那個是正字？謎過×檔案！
記者：馮冠芝
攝影：陳盛臣、楊錦文、伍慶泉
上周新場「DelayNoMall」，讀音與廣東話問候他人娘親的4字真言諧音雷同。商場揸Fit人G.O.D.主腦楊志超，繼「拾肆K」後仲敢？他解畫酷愛次文化，Sell的正是一種通俗的另類態度。
Mall宗旨 拒舉中指
「拾肆K」未必是教訓，七彩「DelayNoMall」插旗銅記，搭巴士走天橋行人路，度度咁揚眼。有人話佢教壞細路，有人話佢創意無限，負責人楊志超說得簡單，此Mall只是G.O.D.「DelayNoMore」精品系列的延伸，並不強調粗口諧音，More與Mall，都取英文原意，「因為香港變得太快，慢少少都會走雞，改呢個名，就係想叫人唔好再遲！」是以採訪拍照時，楊志超婉拒我要求，連舉食指都唔肯，但不舉不講還需認，個Mall確實因老母而聲「名」大「噪」，而楊志超，壓根兒享受這種Noise，「商場個名確實有爭議性，就係有人辯論先好！應唔應該講粗口係一個好有趣嘅社會問題，有人講好過將問題掃落地毯底！呢種討論，都係DelayNoMore！」X，生意人！
粗口文化 跟地球轉
可楊志超轉頭說：「G.O.D.同呢個Mall，唔講錢講態度！」全個商場由個名到內膽，全是他的實驗，來年2月2樓會加設紋身中心，3樓則置ArtGallery……「Cheap唔Cheap係拍賣行拍賣出嚟嘅價錢！道德價值不停轉變，以前有人認為紋身等如黑社會，但現在亦有很多明星、足球員紋身！粗口文化亦然。」你可以鬧佢，但起碼佢提供咗一句好句，等大家怒氣攻心而身在港鐵時，可後顧無憂大叫一句：「又甩底？我明明約咗你喺——DelayNoMall——度等！」而唔驚被罰錢！
街坊回敬
地址：怡和街68號
低能仔識擦鞋 唔識「小狗懶擦鞋」
楊志超玩粗口Sell態度，DelayNoMall唔知有無錯到。但玩粗口玩到出書《小狗懶擦鞋》（$55）的作者彭志銘，就一定正字正確！身為次文化社長的彭志銘，多年來研究廣東話，並將粗口的來源集結成書。《小狗懶擦鞋》，就是5個門字部的諧音字，本書一開始就糾正5門系列其實全部有古字，從「尸」部，除此5字以外，其實難為粗口定分界，「那5字，是中國文化中，與性有關的忌諱語。香港廣泛定義是此5字為粗口，而其他詛罵人，攻擊性的句子，不算粗口。」其實連政府對粗口都沒有一個清晰定義，彭志銘就係睇唔過眼才出書，「約定俗成唔講得嘅粗口，其實無人知點解唔講得，但政府就只識禁。此書要教人明白粗口係咩，知道當中意思後，你講唔講唔緊要，但要對自己講過嘅說話負責。」
死仔包毒過×
睇《小》就會發現，原來「死仔包」個「包」字，出自戰亂走難，小孩遇不測而亡，只能用布打「包」屍體，其實比好多涉及性的X字還毒。相信得悉來源後，好多父母想用時都會收口。一本專「講」粗口的書，原來真係可令人少講粗口，「所以政府幾低能，咩都禁。我唔驚，係怕佢禁我再次顯示佢低能！喺書展出書時我找來吳昊、容若、黃仲鳴為我寫序，量班低能仔見到呢啲名會收手。若真係拉，我就將次文化嘅檔封黑布再寫上『X你老母！曾蔭權！』個X又唔係粗口，睇吓佢哋點！」這算是訪問中彭志銘講得最粗俗的一句！再次印證，坦蕩蕩研究粗口，是教育是紀錄，我亦慶幸《小》已加印第4版，起碼淫審處做少一件𤓓事。
料理農務系老師 出Tee洩憤
上述兩位為創意為教育，回歸平凡，就逃不過粗口洩憤目的！在一個名MALLiD網站供人售賣自家設計的Tee，發現其中命名為「福建大學」的網上小店，售賣印有「料理農務系」、「X梨試佛」的衣袋，找來設計師聊聊，出乎意料，原來佢為人師表！「學校當然唔知我設計呢啲Tee！其實我之前從無諗過要設計咩，但我睇咗套舞台劇《母語教學》好深刻，劇中爆晒粗表達對教改不滿，我實在感同身受，喺現時老師辛苦過學生N倍，又不能在學校發洩，爆粗Tee可以助我發洩！」陳Sir放學後Open，那麼上課時若學生爆粗，會否只許州官放火？「我會隻眼開隻眼閉，視乎場合！講到底，粗口只係助語詞，既然有粗口嘅存在，有Supply就一定有Demand啦！」唔好再估呢個陳Sir會唔會係教你Econ位班主任啦！一件粗口諧音Tee話畀大家知，教師，都係人啫！
MALLiD陳SirTee網址：
http://fuckingu.mallid.com/main.do?a=a1
http://www.mallid.com/product.searchProduct.do?method=search&searchTag=ABBR
粗口好文化
舞台劇照爆
近年舞台劇粗口橫飛，有時更被當成PunchLine，濫用還是洩憤還是諷刺由觀眾自行判斷，只能說改咗個粗口諧音名，又真係Eye-catching好多。今日開騷的《雕》DEAL！一劇食晒中英文，故事同雕、交易有關，原本套劇想叫《交易》就算，又真係差幾班。
查詢：96499303龔小姐
㗎仔網上教精你
查Wikipedia，會有詳盡廣東話粗口解釋，但最過癮還是一個由熱愛香港電影的日本人所建立的「香港映畫的粗口」網站，列舉好多星爺電影作例，又用日文拼出廣東粗口的發音，香港電影與粗口居然讓日本人先做，真慚愧。另外，本年熱爆YouTube短片之一：《福佳始終有你》之黃宜弘揸實宗旨。
網址： http://www.geocities.jp/houhendai/chohau.html
網址： http://hk.youtube.com/watch?v=4mQWAt-SfkU
由尹光開始唱衰你
咁多年嚟，尹光係香港唯一一個見得光的粗口歌歌手，歌詞入肉，《少理阿爸》一句：「你未出世係條精蟲另一半係卵，估唔到你唔精反而做咗一粒懵卵」，絕！相比下，LMF潛水不見影，但佢哋首《大懶堂》，係唔想返工時最好的寫照。
後記：
我以為自己有大肚婆視網膜效應，講開玩粗口諧音，就發現香江老母處處聞。彭志銘就話，玩粗口諧音每個國家都有，但越多諧音即表示當地越封建、禁制越多。「正如個老竇窮，先會改自己個仔叫旺財！」哦，原來唔係我視網膜出事，係位列高官者視網膜縮細，不過唔緊要，逆境中港人創意更濃，《秋天的童話》唔講得「躝癱」，下次用番其古漢雅語「蘭彈」，雖然係就係「澳門朋友」，只能慨嘆高官們天天將西九掛在嘴邊，𡁻完再反芻，西九掉轉嚟講變成……
