電力公司加價，自然引起各方批評，因為人人只望自己公司加薪、加價，而唔希望其他公司加價嘅。反對加價，乃人之常情，無奈當今世界，柴米油鹽醬醋茶豬肉牛肉雞蛋都加晒價，通脹重臨，一來反映世界經濟好景，亞洲更加好，二來反映農產品、資源產品嘅需求甚大，迫使價格上升。唔識睇價格趨勢，大家可以睇吓股價，二○○七年嘅神華（一○八八）、中國遠洋（一九一九）、中石油（八五七）的股價升到飛起，就知道煤、油價格與亁散貨輪好景，推測到電力公司要加價啦。批評加價，人人可以，但批評要有理據，如果話電力公司「賺到盡」，並不符合事實，譬如港燈過去三年就賺唔到准許利潤嘅13.5%，機構投資者有微言。第二，議員話電力公司加價遠超通脹，其實電力公司與巴士公司嘅成本與本港CPI指數無甚相連關係，一個係蘋果、一個係橙，煤價、油價、運貨價升咗幾十巴仙，唔會完全反映在本地CPI上。
學生Y問左丁山，最近電台評論員講邊際利潤，何謂邊際，佢聽到不着邊際。評論員好似係以兩間電力公司為例嘅，話佢哋嘅「邊際利潤」有二十幾巴仙，邊度有生意咁好搵㗎！當然唔係冇，但長期嚟講，只有公用事業公司嘅設備折舊相當多，資本性投資日減，營收早已超出打和點（breakevenpoint）好多點時，先至經常有二十幾巴仙嘅盈利率，即係話，老牌公司方可如此。
評論員口中嘅「邊際利潤」，相信係佢錯誤繙譯（profitmargin）。Profitmargin係講一個平均中，做一百蚊生意，賺咗十五蚊，盈利率係15%。邊際利潤應該係marginalprofit，即邊際收益減去邊際成本，講究每增加1%營業額，可以帶來多少利潤。以過去（九三、九四年）嘅《星島日報》、《南華早報》嚟講，每增加一元廣告收入，新增利潤（marginalprofit）可以有七、八毫子，記得當年呢兩張報紙嘅稅後盈利率（aftertaxprofitmargin）接近45%，簡直係日日印銀紙，與今日報業嘅辛苦法，不可同日而語！