Beyond復出，獨欠黃家強。有線旗下驕陽音樂有份主辦、明年2月在北京工人體育館舉行兩場的「Beyond雙傑北京演唱會」，只得黃貫中（Paul）和葉世榮掛帥上陣。家強對於被飛懵然不知，阿Paul則稱不知是以Beyond名義開騷，有線解釋因時間倉卒未能成功撮合三子，大家各執一詞，但實情是不和多年的阿Paul和家強，已去到「有你冇我」的階段。
本地樂隊Beyond05年解散後，樂迷一直期待黃貫中、黃家強和葉世榮再度攜手合作，有線旗下的驕陽音樂插手搞演唱會，頭炮是和內地的北京影音藝典、火龍娛樂合作，明年2月1、2日在北京工人體育館舉行的兩場「Beyond雙傑北京演唱會」，門票售價分別是900元、1,480元、1,980元、2,280元，內地已開始賣飛和做宣傳，但Beyond復出只得阿Paul和世榮，冇預家強，事有蹺蹊。
蒙在鼓裏
家強：唔知有咁嘅事
家強、阿Paul和世榮05年2月在紅館舉行6場「BEYONDTheStoryLive2005」演唱會後，到美加及內地作巡迴，三子聲言正式解散組成了22年的Beyond，此後各自發展，更表示拆夥是因為彼此的音樂理想不同。一直有傳Beyond拆夥的真正原因，是阿Paul因為女友朱茵的關係，與家強水火不容，隨着時間過去，二人的關係不但沒有修復，還越搞越僵，今次演唱會沒有預家強，便是最好的證明。
家強所屬的藝能經理人公司發言人，昨對Beyond雙傑北京演唱會沒有預家強一事回應說：「我哋從來冇收過有線、阿Paul、世榮或者任何人提過有呢個Beyond演唱會，係唔知有件咁嘅事，如果有機構想搵家強做嘢，我哋好歡迎，但呢個演唱會已經落實咗，唔可以改變。」至於是否家強被飛出局，發言人表示要先了解事件，但阿Paul和世榮私下應沒有邀請家強演出該演唱會。
阿Paul助手Johnny昨日則解釋說：「我哋係喺2月1號去北京表演，但我哋一直係同內地主辦單位接觸，主辦單位同我哋傾時，話係請阿Paul嘅汗樂隊同黑豹樂隊做搖滾音樂會，完全冇話要邀請Beyond，亦冇話要用Beyond個名做音樂會。我哋對呢件事係全不知情，所以要再了解件事。」有份演出的世榮昨日身在北京，他透過長途電話說：「今次唔係一個純Beyond嘅演唱會，係Beyond嘅葉世榮同黃貫中加黑豹樂隊嘅搖滾音樂會，由主辦單位個別邀請我同阿Paul演出，我唔知點解冇家強份，你哋最好向主辦單位求證。」
含糊其詞
有線稱時間趕難撮合
三子各執一詞，主辦的有線答案也含糊其詞，徐小明昨日在電話中說：「Beyond係香港樂壇好好嘅組合，我哋其實係有意思搵Beyond復合嘅，不過今次因為個別因素，加上時間上又比較倉卒，所以未能夠成功搵佢哋一齊合作，希望下次可以有機會。」
除了Beyond雙傑演唱會外，驕陽音樂明年4月還會在北京工人體育館舉行3場蔡依林演唱會，徐小明說：「搞演唱會係想攞經驗，香港冇場地，所以喺內地搞，蔡依林第一次喺北京搞騷，佢好緊張，要求好高。」
撰文：林妃
娛樂資料庫：離離合合05年散檔
80年代初
成員有黃家駒、李榮潮、葉世榮和鄧煒謙，鄧把樂隊命名為Beyond，李榮潮離隊後黃家強加入。
85年
自資舉辦「永遠等待演唱會」，同年結他手陳時安離隊，黃貫中加入。
87年
Beyond成員包括黃家駒、黃家強、黃貫中、葉世榮及劉志遠。
88年
劉志遠退出，剩下4人。
93年
靈魂人物黃家駒在日本錄影遊戲節目從舞台墮下喪命，剩下黃家強、黃貫中及葉世榮。
05年
Beyond舉行告別演唱會，三子作獨立發展。
資料來源：《蘋果》資料室
不和導火線：朱茵
相識超過廿載的黃家強及黃貫中（Paul），03年開始被傳不和，近日二人更拒絕合照。
03年
朱茵公開大談禁慾話題，家強其後取笑阿Paul可能仍是處男，引起朱茵不滿。
同年10月
朱茵與阿Paul到泰國的蘇梅島度假行蹤外洩，被雜誌拍下照片，朱茵表示是遭男友身邊人爆料，矛頭直指家強。
06年7月
家強與太太Makiko在跑馬地馬會補擺喜酒，阿Paul沒有到賀，有指他不在嘉賓名單之列。
07年7月
家強舉行「RoadShowLive黃家強音樂會」，只請世榮任嘉賓而沒請阿Paul。
07年12月
阿Paul出席「RoadShow至尊音樂頒獎禮2007」記招時與家強左閃右避，他更直言「合照最好唔好啦」。
資料來源：《蘋果》資料室
