拉闊足球場:讀者齊撐紅魔英超冧莊 - 牽牛

拉闊足球場:讀者齊撐紅魔英超冧莊 - 牽牛

英超聖誕快車開動,一路跟隨阿仙奴之後的曼聯亦乘勢殺上,以1分之微搶到「1哥」寶座。馬會足智彩更將紅魔於聯賽封王的賠率,調低至1.57倍大熱;今次〈拉闊足球場〉的讀者,大部份都撐紅魔可勝出這「長途賽」,不過就不會買他們封王,因為熱得太過份!

M:Mike 牛:牽牛 A:Andy
M:Andy,你作為車路士fans,點睇今年呢場英超聯王者之爭?
A:我會睇好曼聯多啲。
M:會唔會同佢哋兵源比較多,人腳較完整有關?
A:我覺得主要同佢哋買人政策較出色有關,曼聯好似買每一個球員都會起到作用。我自己雖然偏愛車路士,不過問心,呢隊波嘅組織、球員腳法等等都唔夠阿仙奴同曼聯砌,只係整體防守戰好啲,尤其是摩連奴時代嘅1球小勝戰術。
M:不過𠵱家換咗領隊……
A:差咗好多,尤其係泰利有傷就成日失波。
牛:係呀,次次都失波喇。
M:一冇咗施治同泰利就係咁啦,呢個都係好重要嘅數據。
A:冇施治都好啲,泰利就真係好緊要。
牛:希望佢哋前面入多啲,夠後面輸。
A:但係車仔前線冇杜奧巴,被迫出埋沙洛文卡勞呢啲唔掂嘅球員,想當年買佢嗰時仲話要同曼聯搶,都唔知係咪紅魔專登托高個價。我記得摩連奴當年都投訴過,買唔到想要嘅人。
牛:係呀,因為車仔買人係由行政總監簡安負責,並唔係領隊話事。
M:咁呢個禮拜曼聯作客韋斯咸,你又點睇呀?
A:我估紅魔贏1球,不過冇乜信心,因為上季韋斯咸兩次對曼聯都贏1:0,好邪。

曼聯衰在唔檢點

今次節目大部份人都撐曼聯贏聯賽冠軍,金水是少數捧阿仙奴的讀者;他的理據是紅魔球員私生活不檢點,如之前有基斯坦奴朗拿度等捲入雜交醜聞,最近又有伊雲斯強姦事件。
牽牛就認為可能是紅魔風頭太勁,狗仔隊都以他們為目標,令大家錯覺以為曼聯球員玩出火。
金水最後補充,曼聯試過於94/95球季煞科戰,遭韋斯咸迫和而失落聯賽錦標,所以今對韋斯咸一定穩穩陣陣,小勝而回。
金水心水:星期六10
韋斯咸0:1曼聯(6倍)

金水

買紅魔封王太蠢

身處倫敦的KK,對於愛隊阿仙奴被曼聯趕過毫不擔心。他認為如領隊雲格所說,落後1分算不上甚麼,認為最重要是球隊已取得聖誕冠軍,因為數據顯示,近幾季聖誕放出的球隊,最終都可順利封王。
對於曼聯只得1.57倍的封王賠率,KK直指是不理智。雖然曼聯現階段狀態奇佳,但回報不足兩倍,卻要等上幾個月,實在太過荒謬。他認為雙雄現時難分軒轅,可能要看1月大家增兵情形而定出冠軍誰屬。
KK心水:星期六10
韋斯咸1:3曼聯(11倍)

KK

Andy貼士

星期六6 車路士2:0紐卡素(6.5倍)
星期六10 韋斯咸0:1曼聯(6倍)
星期六38 愛華頓1:1阿仙奴(6.5倍)

牽牛今集提供

星期六6 車路士2:2紐卡素(18倍)
星期六10 韋斯咸1:2曼聯(7.5倍)
星期六38 愛華頓1:1阿仙奴(6.5倍)

足智彩英超冠軍賠率

1〉曼聯:1.57倍
2〉阿仙奴:2.9倍
3〉車路士:8.5倍
4〉利物浦:13倍
5〉曼城:400倍
6〉愛華頓:1000倍

〈拉闊足球場〉
下次舉行日期:03/01

想參加?即上
http://soccer.atnext.com/jp/soccer