官恩娜愛華仔夠型
「喺我心目中嘅女歌手當然係鄭秀文，我覺得佢嘅歌好好聽，而且舞台表演都好精采。佢咁多年嘅歌都帶畀我好多回憶，我讀書時已經鍾意佢，同佢嘅音樂一齊成長。男歌手當然係華仔喇，佢一直都係我偶像，而且又好靚仔，之前有報道話佢救fans都不知幾型。」
呂慧儀撐祖兒聲靚
「心目中嘅最受歡迎男歌手係陳奕迅，佢唱歌好好聽，而且今年佢嘅成績唔錯，曝光率又多，所以我睇好佢今年攞呢個獎。至於最受歡迎女歌手就係容祖兒，因為佢唱歌好好，聲線好靚，而且好努力，我喺公司見到佢，都覺得佢好nice，所以我希望佢攞到最受歡迎女歌手。」
唐文龍迷康仔唱Jazz
「我心目中最鍾意嘅就係蘇永康，佢簡直係獨一無二，唱Jazz同現場真係好出色同埋好有feel。要講出色其實好多歌手都係，好似張學友同Eason（陳奕迅）都好犀利，但係可能我偏好jazz啦，同埋佢真係好似一架揼氣機咁，所以如果畀我揀，我一定係揀佢。」
薛凱琪難忘張國榮
「男歌手我就比較欣賞張國榮同陳奕迅，我覺得佢兩個喺舞台上唔止係表演，每次嘅演出都好似畀到人一種開派對嘅感覺，佢哋好投入去享受自己嘅show。女歌手我就覺得係杜麗莎，佢唔單止歌藝上令人好難忘，而且佢仲會將佢嘅歌藝教授後輩，令我哋獲益不少。」
採訪：王崇穎、林惠卿、藍文浩
