花旗股市認真大整蠱，吼住港股期指結算前跌鋪勁嘅，港股淡友梗係唔客氣，趁勢發動總攻擊，恒指一跌就成500點，1月期指更跌咗565點，由高水變低水，形勢當然唔多盞。
恒指打破咗近日嘅上升趨勢，恒指昨日企10日線收市，如果花旗昨晚繼續跌，下禮拜一呢條線應該冇得守。
花旗股市前晚跌得咁勁，係因為高盛話好多間大行都撥備唔夠，次按損失仲有排撥，點會唔嚇親班股民？事實上，今個月花旗嘅零售銷售咁曳，加埋樓市咁殘，花旗股市喺高位點撐得住？近日一直支撐股市嘅藉口──「櫥窗粉飾」又到尾聲，大家梗係走得快好世界啦。
思捷50日線有支持
經濟前景差，炒家又話下個月聯儲局會減息，美元跟住大插，呢啲已經係指定程式，未來都會係咁炒作，如果炒反彈，又會話憧憬聯儲局減息可以救經濟，大家千祈唔好當真，但係炒賣就一定要昅實呢啲風向嘅轉變。
巴基斯坦政局不穩，有分析員話係昨日港股下跌嘅原因，攞嚟講嘅啫，歷史話畀我哋聽，港股唔會對呢個地區嘅政治咁敏感。
思捷C輪5927：思捷（330）昨收115元，股價喺50日線明顯有支持，短線有機會試番123.30元高位，可以買啲C輪5927博短嘅，隻輪昨收1.18元，槓桿率9.8倍（有效6.3倍），正股升上123.30元，5927應該有5成升幅，正股跌穿111元止蝕。