賭王何鴻燊長房兒孫最愛寵物，女兒何超雄養近百隻貓狗，孫女何家華則投資200萬元開寵物美容中心。不過，在這個充滿愛護動物溫情的場合，主持剪綵的賭王竟然逐一品評各房女兒的樣貌，指三姨太的女兒個個都靚，但四房的超盈卻一般。 澳門直擊
賭王何鴻燊長孫女何家華投資200萬元，在澳門氹仔開設「DogOneLife」寵物美容中心，賭王昨日與四姨太梁安琪一同出席開幕禮。
超儀爛口變乖女
二房細女何超儀（Josie）聖誕生日，何鴻燊折現做禮物，問他可夠Josie出碟？他說：「應該夠，佢乖女咗好多，之前學爛口，爛口過男人，我叫佢斯文啲，佢叫我唔好理，𠵱家好晒！佢𠵱家仲搏緊，希望做多兩年可以做到影后啦，佢聲又好靚，演技又唔錯，又打得，搏多兩年啦，睇吓喺邊度攞獎。」他大讚超儀靚女，然後逐一品評各房女兒的樣貌，他說：「靚女呢，阿二就有Pansy（超瓊）同Josie（超儀），阿三就個個女都靚，阿四嘅大女（超盈）就麻麻，細女（超欣）就靚到不得了！」問賭王其他女兒不會呷醋？他說：「我好公道嘅！」老婆呢？賭王說：「梗係個個靚啦，唔靚就唔係我老婆啦。」
記者問賭王有沒有養寵物？他即滔滔不絕說：「冇，我打咗幾十年獵，以前去開中山打，不過沙士之後，啲果子狸消滅晒，就冇再打喇。試過一次打40隻沙椎、打鷓鴣，帶埋啲狗去，啲獵物一打落嚟，啲狗就衝埋去，啲狗見你打唔中，仲會擰晒頭㖭。」
血腥射殺百隻雁
賭王越講越興奮說：「舊年西班牙國王請我去馬德里打獵，一日打咗100隻雁，好似落雨咁，多到唔信。」問到他近期香港出現虐貓事件，他就即刻轉口說：「啲野貓好慘，香港政府應該想吓辦法，我做過七年愛護動物協會（SPCA）主席，英國王子都係又做SPCA主席又打獵。我哋打獵啲獵物係即死，冇痛苦，不過試過有次響伊朗，打咗隻牛，佢不停咁叫，叫咗半個鐘頭，我後來補咗一槍等佢死快啲。我呢，黃猄就唔打，見過兩隻鹿一齊好恩愛，都冇打。」
主人家何家華就表示希望將寵物美容中心發揚光大：「我有學爺爺做生意，希望好似佢咁，佢喺澳門開第一間賭場，我就開第一間petspa，將來做連鎖店。」
採訪：羅慧敏 攝影：仇志德
人物誌：苦命孫女愛心滿瀉
現年31歲的何家華（Faye），父親是賭王何鴻燊與元配黎婉華所生的長子何猷光，但她6歲時，父母不幸在葡萄牙首都里斯本車禍離世，遺下她及妹妹家文，一直由爺爺賭王供書教學，14歲留學英國，03年在澳門下嫁同齡、任職摩根士丹利的男友Mike。何家華育有一子一女，而她與賭王兒孫相比，生活十分平民化，月前就被本報拍得與女伴逛專賣平價貨的加連威老道，而愛狗如命，育有10隻狗的她，現為澳門愛護動物協會主席。
