自從「天水圍城」同「悲情城市」俾人畫上等號之後，社會各界開始特別關照呢個座落新界大西北嘅新市鎮。唔少大企業都出錢出力空降溫情，尤其係班細路最開心，聖誕假期特別多筍嘢預埋佢哋，除咗新力香港將半個亞洲遊戲展搬入去天水圍，等班細路可以免費打最新電視遊戲之外，銅鑼灣大地主希慎（014）聯同中英劇團，搞咗次「藝術之旅」，請200個天水圍中學生，去灣仔香港演藝學院參觀《聖誕夜驚魂》嘅後台操作，仲試用環保物料設計舞台劇服飾，食完聖誕自助餐後，再去埋尖沙嘴香港文化中心睇舞台劇《風流劍客》。有得食、有得睇仲有得玩，比齋打機，應該更受天水圍家長歡迎。
話時話，呢種咁另類嘅活動，唔好講話天水圍，即使沙田大圍，或者荃灣荃景圍嘅年輕人，都冇咩機會接觸，可以嘅話，應該各區都搞吓，咁就功德無量咯。