傳媒工作者都想企喺最前線，「爆新聞」更加係每個記者夢寐以求，不過，貴為中國第一大報，爆咗段對財經界嚟講，稱得上驚天動地嘅新聞，但轉過頭收番，都幾羞家。
噚日《中國日報》網上版環球在線出咗條新聞，引述共產黨中央政策研究辦公室副主任鄭新立話，中央政府正醞釀成立能源部，兼將證監會、銀監會同保監會三大監管機構合併，以便改變目前國內能源同金融領域存在機構多、職能重叠、效率低等問題。報道仲搵咗中央黨校教授周天勇分析。
不過，冇幾耐另一內地媒體《新浪財經》就大字標題話「中國日報否認證監會銀監會保監會合併報道」。據新浪報道，向《中國日報》記者求證時，相關記者話嗰篇報道有誤解，原因係報道裏面嘅外國專家對內容理解有誤。
經常睇大陸新聞網站嘅讀者，都知大陸新聞報道唔係你抄我，就係我抄你，所以嗰位《中國日報》記者話，《中國日報》正聯繫其他網站，爭取撤稿消除誤會。
《中國日報》（ChinaDaily）來頭唔細，1981年創辦，係中華人民共和國成立以嚟創辦嘅第一份、兼目前唯一一份全國性英文日報，被公認係中國最具權威性英文刊物。至於網路版就喺95年誕生，係中國第一家上網嘅全國性報紙。今勻有晒消息來源，做埋回應，話係外國專家對內容理解有誤，呢個藉口似乎有啲牽強究竟真係爆錯料，定係有人喺唔適合嘅時間、地點爆料，看官自己諗喇。