今年的除夕倒數特別璀璨耀眼，每晚閃個不停的幻彩詠香江，將押後至接近凌晨時分上演，而且國際金融中心二期的外牆又會以煙花作Countdown。要睇這個歷史時刻，當然要過對岸尖沙嘴的文化中心、星光大道，但要同人迫？No喇！尖沙嘴唔少望到正IFC的餐廳都延長營業時間，一於預先Book定枱，食蠔、食意大利菜、食新派越南菜乜都好，醫飽肚，再同Honey一齊浪漫倒數。
記者：劉慕霞
攝影：周旭文、林栢鈞
Model：YuLee、Kitterick@PureModels
豪華版新派越菜
新年唔一定食西餐，新派越南菜就集齊東南亞美食的惹味同西菜的講究賣相。金牛苑全場素白裝修，水晶燈吊扇Modern得嚟夠華麗，靠窗位有近50個。食物方面，傳統越南菜有各式河粉檬粉、春卷米紙卷，Fusion一點有燒羊扒、南瓜蟹肉翅同至尊菠蘿炒飯，雖然係越南菜，感覺較平民化，但餐廳堅持用飛機貨。唔想心多多揀來揀去，揀除夕套餐就唔使煩。
至尊菠蘿燒飯$268
帶子粒、海蝦球、蠔皇鮑魚仔等做配料，絕對是菠蘿炒飯的豪華版，加埋炒飯底，香口過人。上桌時以玫瑰露營造火燄效果，散發濃濃的菠蘿香。
香草燒羊扒$60/件
用薄荷香草略醃的新西蘭羊鞍，以慢火煎香，肉汁鎖緊，蘸香草汁，微酸，每次最少Order兩件。
南瓜蟹肉翅$168/位
每碗足有一両金山勾翅和兩錢蟹肉，用上湯和本地南瓜茸推成羮，很濃厚和甜香的南瓜味。
蒜茸大頭蝦$138起/隻
越南大頭蝦出名膏多又綿滑，唔似得膏蟹咁死實，掃上蒜茸牛油焗完再燒，即點即製，惹味！
金牛苑越南茶館（27304866）
地址：尖沙嘴海港城OT310號舖
收費：最低消費$388/位（6:00pm至12:30am），另設加一服務費
食蠔鳥瞰維港
睇親煙花都要頭岳岳，何必呢！喺酒店18樓的蠔酒吧約有50個座位望到國金，真係可以居高臨下，欣賞維港兩岸景致，舒舒服服睇表演！早啲到，嘆完頭輪美食先慢慢談住心等倒數都未遲。蠔酒吧由經驗廚師主理，煎鵝肝、和牛、羊架等大路西菜算係濕濕碎，仲有招牌蟹餅同日日新鮮從美國、法國、澳洲等地空運到港的阿拉斯加蟹腳、翡翠螺、大蜆、龍蝦仔。講到尾，來蠔酒吧，唔食蠔就嘥晒！踏入秋冬季，法國蠔最合時，蠔味濃郁且富層次；鍾意清甜的可揀美國蠔，厚肉又腍身，澳洲蠔則最有海水味，每隻都係$30至$90，新鮮貨嚟計其實唔算貴，除夕夜確實要「蠔一蠔」嘅。
蟹餅二重奏$290
坊間食的蟹餅夾雜了蝦肉、魚肉，這個蟹餅是100%由美國新鮮大肉蟹打成，簡單焗香，鮮味一流。
優質美國厚切西冷牛扒$780/400g
西冷位牛味特別濃郁，靚扒從來不用蘸醬或醃味，師傅只輕輕用海鹽煎香，五成熟最能嚐到鮮嫩肉質。
香脆焗羊架$450
美國羊架外撒上香草、辣椒、洋葱及麵包糠等燒香，酥軟無羶味，配埋香濃的肉汁，羊癡一定愛死。
蠔酒吧（23691111ext3145）
地址：九龍彌敦道20號喜來登酒店18樓
收費：最低消費$1,788/位（除夕晚餐6:30pm至11:00pm）、最低消費$268/位（星夜暢飲10:30pm至2:00am），另設加一服務費
備註：喜達屋折扣優惠卡及信用卡折扣優惠均不適用
傳統喜慶意大利菜
Habitu意大利餐廳一向主打HomemadePizza同Pasta，材料、做法、味道正宗。今個除夕還特別設計了六道菜的晚餐，同時集合了傳統與新穎意國風味。意大利人於節慶會吃野味或貴價海鮮，由頭盤、主菜至甜品均少不了鵝肝、魚子醬、鷓鴣同意大利飯等菜式。當中仲有一道傳統意大利燴肉腸作為Chef'sGift，一齊學吓鬼佬食腸賀新年，夠晒特別。去Habitu倒數，一定勁有現場感，除了臨海的地理優勢，仲有一列露天茶座位，凍就凍啲，但同愛人攬住睇煙花，個心都暖晒啦！
傳統意大利燴肉腸
意大利豬肉腸Cotochino，以豬骨湯和雜菜燴過，質感和味道卻像午餐肉，濃郁鹹香。
自家製通心粉伴鵝肝、鳳梨香梨汁
鵝肝煎香，剩餘的鵝肝汁用來炒通心粉，更顯甘香油潤，酸甜的鳳梨香梨汁，減低了不少膩滯感。
HABITURISTORANTETHEPIER
（31010901）
地址：尖沙嘴海港城OTG63號舖
收費：六道菜$888/位（除夕夜營業至2:00am），另設加一服務費
除夕倒數煙花時間表
23:43 幻彩詠香江配合樓頂煙花
23:59:40 國金二期北面外牆兩側發放煙花進行倒數，多幢大廈外牆的液晶體大螢幕顯示倒數時間
00:00 國金二期的外牆及多座大廈的樓頂將會繼續上演約兩分鐘的煙花表演
