阿仙奴前晚喺英超作客樸茨茅夫，結果慘被悶和0:0，送咗個1哥位畀曼聯之餘兼跌落第2位，仲俾曼聯反領先1分。𠵱家最驚嘅肯定係佢哋嘅多哥前鋒艾廸巴約，事關佢早前下巴輕輕，話季尾如果攞唔到聯賽冠軍就退休，家陣唔知點收科。
唔驚亨利返「廠」搶位
艾廸巴約份人向來囂到爆，日前接受訪問時話自己勁過伊度奧同埋亨利。佢話：「就算雲格（阿仙奴領隊）簽入伊度奧，定係買返亨利，我都冇有怕，有能力保住個正選位。」咁都未算，早排喺阿仙奴排榜首兼領先曼聯幾分嗰陣，佢口輕輕咁話若然攞唔到聯賽錦標，就高掛球靴。佢咁講：「如果贏唔到聯賽錦標，我會通知雲格以後都唔會再踢波。」
艾廸巴約此話一出，英國有網友讚佢勇氣可嘉，亦有人笑佢搵定份工都得。但最抵死嘅係，竟然有網友踢爆佢係隨口噏、當秘笈，直指佢喺06年世界盃決賽周作過相同承諾，話如果幫唔到多哥贏冠軍就退休，結果係點？之後咪繼續踢波囉。
哈利列納「潤」雲格
點都好，英超仲有半季，邊個敢話今季打得好好嘅阿仙奴贏唔到呀？不過，如果艾廸巴約唔想博，可以同雲格講話佢要過檔國際米蘭，事關國米𠵱家喺意甲放甩第2嘅羅馬7分，聯賽錦標應該飛唔出佢哋五指山。
講番前晚老樸對阿仙奴場波，老樸領隊哈利列納排9-0-1陣式，賽後俾雲格狂插戰術保守，但哈利列納反潤番雲格。佢咁話：「阿仙奴嘅控球能力係全國最好，根本冇球隊搶到佢哋個波，係球隊對住佢哋都以1分為目標，唔係咁踢應該點踢呀？」