公司上市好多時會喺上市儀式送份紀念品畀港交所（388），噚日港交所收到今年最後一份紀念品，由今年最後一隻上市新股興業銅業（505）送出。興業銅業送咗個「銅龍奪珠」擺件畀港交所，飛龍在天果然非同凡響，興業銅業噚日股價逆市大升。
雖然今年係新股年，累散戶輸錢嘅新股好少，但興業銅業招股反應麻麻，上市前問證券行孖展反應，得嗰幾千萬，同之前新股一早借爆有天淵之別，公開認購只得4.5倍超額認購。不過，興業銅業噚日掛牌，收市價較招股價1.7蚊升93.53%，成為今年首日升幅第四名，升得咁勁，好多冇抽到嘅人都呻笨。因乜原因表現咁好？華華試用另一角度睇──佢哋份紀念品銅龍奪珠。
充份運用玄學策略上市
負責呢份上市禮物嘅公關話，銅龍反映興業銅業喺內地業界嘅龍頭地位，而龍抓住嘅係一粒水上明珠，水為財，即係生意啦，表示佢哋生意越嚟越好。咁係咪因為呢件咁好意頭嘅紀念品，打救咗興業銅業嘅股價呢？
堪輿學家麥玲玲話，上市公司送禮畀港交所，揀好意頭同傳統嘅吉祥物如瑞獸麒麟、龍、龜呀咁，一定冇錯，物料最好配合公司本業就最理想。興業銅業送隻銅龍，好明顯係一種旺公司本業嘅意頭擺件。至於話送嘅禮同股價首日急升有冇關係，麥師傅話，要配合埋上市日、董事生日等因素，興業銅業本業屬金，揀27號掛牌，因為係月未日，五行屬土旺日，土生金，自然對股價有利。
另外，公司嘅代號係505，佢17號截止招股，定價係1.7蚊，都係同土或者金有關嘅字，再加埋上市吉祥贈品，由始至終就係一次充份運用玄學命理策略嘅上市計劃。
送模型冇運行 畫作最老利
睇番今年上市嘅新股，似乎送模型嘅，第一日股價都冇好下場，好似越南製造（422）送綿羊仔模型、中國重汽（3808）送重型汽車模型，首日股價都跌一成多，反而新鑫礦業（3833）同天工國際（826）送畫，股價表現最好，畫中人越多越老利，阿里巴巴（1688）整幅18founders（18位創辦人），即成為今年新股王，幾掂。
新股上市送禮佳品與股價表現
《部份掛牌首日勁升之上市公司》
阿里巴巴（1688）
紀念品：18位創辦人畫像 首日股價表現：+193%
新鑫礦業（3833）
紀念品：掛布畫 首日股價表現：+119%
興業銅業（505）
紀念品：銅龍奪珠 首日股價表現：+94%
天工國際（826）
紀念品：山水刺繡畫 首日股價表現：+82%
英皇證券（717）
紀念品：金牛 首日股價表現：+79%
陽光紙業（2002）
紀念品：帆船模型 首日股價表現：+3%
比亞廸電子（285）
紀念品：可換殼電話 首日股價表現：+2%
《部份掛牌首日勁跌之上市公司》
越南製造（422）
紀念品：綿羊仔模型 首日股價表現：-17%
中國重汽（3808）
紀念品：重型汽車模型 首日股價表現：-16%
安東石油（3337）
紀念品：A字架及螞蟻模型 首日股價表現：-13%
東岳集團（189）
紀念品：水晶球畫飾 首日股價表現：-12%
港交所輪流展出紀念品
每年新上市公司有幾十間，計埋噚日上市嘅興業銅業，07年就有82隻新股喺主板上市，即係話港交所一年閒閒哋收到幾十件公司送嘅紀念品，咁多年積積埋埋冇一千都有幾百件，究竟港交所會點處理？華華問過港交所嘅知情人士，佢話大部份嘅紀念品會收埋喺倉度，只係揀啲有特別意義或者有代表性嘅紀念品出嚟擺，輪流展出，想睇可以去港交所展覽館或進行上市儀式嘅訪客廊，嗰度開放畀公眾，大約每3個月更換一次展品。
知情人士又話，佢哋冇規定上市公司一定要送紀念品，不過大多數都識做，送件嚟留念，有啲幾特別，好似曾經有間公司送個好多呎長嘅牌匾，不過𠵱類紀念品太大，無法展出。展出嘅紀念品有幾特別？好似一啲可以展示公司行業獨特性嘅模型，又或有特別意義嘅上市企業送嘅紀念品，都會有機會做展覽，好似首隻全流通H股建行（939）送出一幅金箔股票，就係呢期展品之一。
電郵：mailto:[email protected]
