緋聞多多嘅李麗珍最近被傳翻撻舊愛、著名填詞人兼有線足球評述員潘源良，有雜誌上星期五晚喺銅鑼灣影到阿潘做柴可夫接載珍妹，當時珍妹一上車就好攰咁樣，阿潘見狀就同珍妹按摩膊頭，好鬼溫柔體貼，跟住阿潘車咗珍妹返自己天后屋企度春宵。
《戀愛季節》燃愛火
噚日馮仁昭打電話問阿潘，係咪同珍妹再續未了緣，阿潘以SMS回覆話：「我是一個與世無爭的人，我不需要訪問或報道。關心我的朋友，只需給我祝福，謝謝。」阿潘咁講，似乎默認同珍妹拍緊拖。
珍妹86年演出阿潘執導嘅電影《戀愛季節》時，同當時已婚嘅阿潘被傳撻着，阿潘因為唔知點取捨，於是填咗首《最愛是誰》，將情懷宣洩喺歌曲之中，雖然呢段不倫戀無疾而終，但阿潘最後都同太太離婚收場。其實阿潘同有線主持陳欣欣分手多時，𠵱家同珍妹一樣回復單身，佢哋大可以光明正大拍拖。
