等咗成個禮拜，《GT5P》喺25/12聖誕節開放Online對戰服務，機迷終可一嘗期待已久嘅16車大戰，筆者亦急不及待來個搶試報告；花大概20分鐘下載更新檔，之後就正式進入網絡對戰模式，而筆者分別以香港、日本、美國ID登入，均可連上OnlineServer，即係17/1中文版推出後，玩日版嘅機迷有機會可以連線。暫時提供8種預設好之對戰場地，像《全民哥爾夫》般定好比賽房間，而不像《審判魔眼》般可自設對戰房間，朋友間難以相約片車，實在有點可惜，希望未來有更新吧。至於車種、賽道及輪胎均有個別限制，玩之前要睇清楚，否則玩開R胎變S胎、StandardMode變ProfessionalMode，全車特性將會大幅改變，明明四驅都可以喪甩尾，搞到划艇慘敗就唔好喇！
《GT》系列首次可作咁大型嘅Online對戰，最多人關心首先係連線品質。實地玩過10場上級嘅鈴鹿賽道，暫未見Lag機窒格現象，就算玩16車混戰賽事，一樣毫不含糊，全不影響入彎同食位。有網友見到敵車不時出現半隱形，以為連線有問題，其實係對方犯規被罰秒，變成透明不致阻礙他人而已，別錯怪SCE啊！
勝王敗寇本平常，但今番首嘗《GT》對戰，網上眾生相實在令我大開眼界，下回續談《GT5P》機品。
記者：徐影龍（對戰ID：dragonwilliam）