28/12/2007.....
天晴
最新動態
英超聖誕新年快車期打到中段，賭友會唔會開始有頭昏腦脹感覺？自問賭波都算心水清，睇埋出場陣容先出手，不過都中晒招。車路士有施治復出，中前場炮手都算齊，連波歷克都入番波，不過前面入夠4球都唔夠數，後面失番4球；施治「彈琵琶」更加醜怪，臨完場輸個12碼，整定單W都唔畀你。
曼聯作客新特蘭，正選陣容唔算強，加上堅尼同曼聯千絲萬縷，難免引起「放分」之嫌；結果又俾曼聯呃晒，上半場已經大比數領先，下半場行住踢咁贏4粒。沙夏入兩粒，睇嚟費Sir係留住泰維斯打韋斯咸。
快車期踢咗兩場，暫時只有曼聯同利物浦兩戰全勝，以佢哋陣容都算正路。比較驚喜係雷丁，兩戰攞4分；雷丁前嗰場補時先贏新特蘭2:1，上仗作客韋斯咸大部份時間打少一個，幾經辛苦迫和1:1。以雷丁兵源睇難頂3場，周六作客熱刺如果臨場陣容唔對辦，正路要番熱刺好過。
牽牛
英超、意甲、西甲、德甲……一星期有百幾場波，想尋寶，勿濫賭！
http://hk.myblog.yahoo.com/footballexperts/
逢周一至五見報