行過報攤，竟然俾檔主叫住買馬經，唯有行埋去幫襯吓，順便睇吓有乜鼠年運程書，八卦一吓。報攤只有三本，兩本係英文嘅（蘇民峰、李丞責），一本係中文嘅（李居明），檔主話：「做冬嘞，李居明嘅鼠年運程書最後上場。」其他啲呢？點解唔見影，難道暢銷得咁緊要，一早沽清？點解要賣英文版本？檔主話：「呢度係中環，有唔少回流人士唔識睇中文，故此出版商出埋英文版，但銷量唔算大。至於其他啲，今年比較滯銷，收埋係紙皮箱，費事嘥力攞出嚟，你要邊本，我可以搵畀你。」既然咁講，無謂勞煩檔主吖，買本李居明就算。返到屋企，正想睇吓李居明講乜，沙田陳師奶打電話嚟：「喂，好離譜啫，亦係笑話。我買咗一本運程書，我好留意阿仔嘅考試運程嘅，呢本書第七十八頁講『屬狗的人今年的運氣』，講到一九九四年甲戌年狗人就話：九四年的少年考試運不好，倘若真的考不好，寧願去讀展翅課程，切不可去讀副學士，出路比較廣闊，勝似捱幾年副學士還未天光。」
陳師奶一路引述，一路笑，左丁山聽完，亦覺得好笑。如陳師奶話齋，九四年出世狗人，（一）冇可能個個考試運不好，（二）九四年出生，今年讀緊中二，陳師奶個仔就係嘞，點會因為考試成績不好而要讀展翅課程呀，儍嘅咩，（三）中二學生怎可能考試不好而讀到副學士？（四）副學士讀兩年，唔係捱幾年。一小段批算，竟有四大錯誤，無怪陳師奶大呼離譜。算陳師奶「夠運」，竟會買到一本咁嘅「鼠年運程」，無怪中環報攤檔主話除咗兩三本運程書有銷路之外，其他全部封塵！
講到鼠年，已有讀者來函要求轉述梁玳寧大姐嘅「鼠年開工好日」，因梁大姐都未公開，左丁山唔敢轉述住。查番通勝，鼠年開工日都幾煩，二月十一日年初五（星期一）宜修飾啫，初六星期二歲破，初八星期四月破，最好開工日期係二月十六日年初十遇上星期六，打工仔除非有長假期，點可以等咁耐呀？老闆都等唔切啫。無計可施之下，勉強揀年初七星期三為開工日啦。