有見《師奶兵團》收視不俗，無綫在今年年尾趁勢再開拍師奶劇《師奶股神》，劇中湯盈盈飾演一個認叻買股票的屋邨師奶，但昨日問她可有買股票時，卻觸起早年她為鍾慧儀填20萬數的傷心往事，她說：「自從俾鍾慧儀嚇親之後都唔敢買！」
無綫新劇《師奶股神》昨日舉行造型記者會，出席演員包括商天娥、謝天華、湯盈盈、梁靖琪（Toby）和滕麗名等等，劇中湯盈盈飾演一個扮闊太的屋邨師奶，自認最叻買股票，問她近年可有買股票投資時，她不禁想起當年傷心事，湯盈盈說：「自從俾鍾慧儀嚇親之後都唔敢買，嗰陣時同佢炒孖展，一齊開戶口，要幫佢填數，接近20萬，𠵱家我只係聽爹哋講至買，好似地鐵、中銀同滙豐呢三隻都有斬獲，地鐵嗰隻係招股價買，滙豐係低位入，買呢啲比較穩陣實際。」
天華擦鞋遭取笑
昨日記者會上，藝員均要說出一組心水數字，如Toby為51025，取其普通話諧音「我要你愛我」，商天娥所講的「511」則為電視廣播有限公司股票號碼，但輪到天華時，他竟說「52620」，即「我愛樂易玲」，在場人士不禁取笑天華擦鞋。大合照期間，未知天華是否屁股被摸，他竟忽然笑笑口說：「邊個摸我隻優質股？」繼而又取笑近日被傳與郭政鴻拍拖的滕麗名，指她神采飛揚，一點也不dry，但滕麗名卻否認蜜運。
對於被指擦鞋，天華說：「你哋唔愛你哋老細㗎咩？同事間要愛對方，愛有好多含意嘅。」問他難道不擔心與樂易玲傳緋聞時，他說：「都未輪到我啦！」
買樓好過炒股票
至於娥姐則表示持有TVB股票達10多年，她說：「當年TVB派股票畀員工，自己後來又買啲，但講投資，其實我會買樓。買股票一定要自己有時間睇住，自己唔會買咁多，3月左右都會停一停。」問娥姐有沒有錢賺時，她笑道：「OK啦。」
採訪：卓寶花 攝影：陳順禎
