每逢年尾就特別多乜選舉物選舉，單單都同廣大嘅讀者講，華華呢個地盤相信要有西九文娛發展中心個地盤咁大先夠。不過，由21世紀報系旗下《21世紀經濟報導》同《21世紀商業評論》發起嘅第四屆中國最佳企業公民評選，選咗新世界中國（917）為「2007最佳企業公民獎」，華華就點都抽啲位提吓。
點解？當然唔係因為新中「好事」多為，喺大陸引進香港嘅居者有其屋發展模式，喺北京崇文區進行規模龐大嘅舊城改造工程；亦唔係因為佢同聯合國兒童基金會（UNICEF）合作，年初時喺全國20個城市推行「愛心熊籌款活動」，更加唔係為UNICEF嘅愛生學校籌到156萬人仔。
明眼人一睇都知，呢個獎係歌功頌德，對新世界呢啲超級大企業嚟講，只係錦上添花，但華華認為最有意義係，彤叔乖孫鄭志剛今年先擔大旗做新中執行董事就有獎攞，頒獎機構又幾識把握時機喎！