荃灣曾先生聽消息推介半新股比亞廸電子（285），佢話：「有個大陸朋友喺比亞廸電子工廠打工，佢做財務嘅，話股價有機會半年炒上一倍，問我點樣喺香港開戶口，準備買貨，仲建議喺現價左右入貨。」
內部消息：半年望倍升
曾先生建議買入價12.7蚊，目標價25.4蚊，揸半年睇升一倍。噚日比亞廸電子最高升1.7%，但隨後回軟，中午跌幅擴大，收報12.42蚊，全日跌4.3%。比亞廸電子上個禮拜四上市，現價較招股價10.75蚊累升15.5%。
英皇證券研究部主管沈振盈話：「比亞廸電子係從母公司比亞廸（1211）分拆出嚟，專做手機元件。睇返過去一年，大部份手機相關業務股份表現都好差，環球手機供應商諾基亞同摩托羅拉等公司，亦發出盈警同調低銷售預測，反映手機業務高增長爆炸期已過，未來只會穩定發展。現時比亞廸電子市盈率32倍，又過咗業務高增長期，股價偏貴。」
手機業已過高增長期
不過，曾先生認為比亞廸電子冇受宏調影響，所以覺得點都會好啲，「股價會唔會比其他內地股票較易炒上？」
沈振盈指：「比亞廸電子係冇受宏調影響，但股價有冇得升，係要睇整個行業前景，手機業務已經過咗高增長需求，又受到原材料價格急升、削減邊際利潤影響，好似隻晶門科技（2878），專做手機『芒』嘅應用方案，定單不斷咁跌。」睇番晶門嘅股價，距離年頭高位1.79蚊累跌64%。
沈振盈補充，通常喺上市公司打工嘅職員，對本身公司都有份情意結，睇好公司股價，缺乏中立性，所以佢叫曾先生聽朋友消息炒股要小心過濾，如果純靠炒作，就冇基本分析可言。
中銀call輪（7984）
快到期 隨時變廢紙
沙田馮小姐話自己早前曾經買入中銀瑞銀call輪（7984），「我喺0.156買，走得甩，之後又『中』番入去。」隻輪噚日跌25%，收七仙半，出年2月到期。馮小姐話，留意到正股中銀香港（2388）喺21個幾至22蚊之間徘徊，隻輪就會大上大落，沈大師解釋：「佢係價外輪，無內在值，臨近到期，可以跌到變零，變廢紙都得。」
沈大師話：「𠵱家啲輪商好精，當一隻股份創新高，佢就出一隻好高行使價嘅輪，用高溢價、高引伸波幅賣畀你，只要隻輪上唔到去行使價，咁佢基本上派幾多賺幾多；你隻輪最近升得咁緊要，因為中銀正股曾上過去22.4蚊，差幾毫子就到行使價，一變價內就會升得好快。」
另外，馮小姐早前放咗隻中鐵call輪（1647），𠵱家想再入，「佢6個幾行使價，貼晒價有餘，仲有無水位？」沈大師話：「呢隻輪算合理，溢價4%，唔算太貴。」沈大師認為可以短炒，仲教路：「唔好用輪價睇，要睇正股。我教人炒新股，一定係將止賺位不停推高，今日最低位變聽日止賺位。有一日佢返轉頭穿咗呢啲位，代表個市要調整，到時咩輪都要走。」
金匡（286）
捧朋友場跟入
牛頭角陳先生早前分別喺1.1元及1.55元兩個價位，入咗金匡企業（286），目標價睇1.8蚊。金匡噚日收0.94元，逆市升1.1%，但實際上呢隻股蟹貨纍纍，回顧佢今年3月底曾突然飆升，即市一度高見3.68蚊，惟後勁不繼，股價大幅插水，至今累跌74%。
陳先生其實一啲都唔熟悉金匡業務，買佢都係捧吓朋友場，「我個朋友炒開股票，見佢成日賺錢咪跟佢買囉。」沈大師回顧，「佢令好多人發達，亦令好多人蝕錢。羅兆輝曾經將佢變身，發展太陽能發電慳電池。今年初，大劉個仔劉鳴煒入咗去做主席，仲炒到上兩三蚊，點知做咗主席個零月又唔做。」
沈大師話：「呢啲股都係少掂為妙，冇得分析，冇乜發展大計，冇炒作條件。」沈大師建議陳生考慮番啲較大路嘅股份，好似內需股蒙牛（2319）、安踏（2020）等，相信中國內部消費會刺激呢類股票上升。
中海油（883）
短期難再大升
美孚陳太兩個月前喺14.5蚊入咗中海油（883），嗰陣佢認為油價會繼續上，所以後來股價去到17蚊嘅高位都無放。中海油噚日收13.12元，微升0.6%，距離陳太個入市價跌咗近1成。沈大師就話，好多時散戶都將好多嘢當咗係必然，油價升多數會帶動油股升，但係有時都要睇番市場供求，教佢睇嘢唔好太單方面。
沈大師分析番個形勢，「長遠嚟講，中石油（857）同中海油都會見番佢哋嘅高位，但短期就各有因素影響各自嘅股價，需要觀望吓嚟緊喺收購石油資產方面，或者喺開油井嗰度會唔會有突破，先至有機會帶動番個股價上升。」不過佢仲係有啲保留，「如果純用個股價走勢睇，其實就反彈得差唔多㗎嘞。中海油𠵱家個PE（市盈率）17倍幾，比起國際同業都高，暫時難再有大幅上升嘅空間；如果中長線都可以，短期就可能有啲阻力。」
新銀（988）
炒變身風險大
將軍澳馮先生噚日下晝喺兩蚊入咗隻新銀集團（988），仲睇半年可以升到3至4蚊。早前公司已公佈咗話配股集資，用嚟收購焦煤業務，馮先生咁樂觀梗係有原因，「我做過吓功課，原來新銀（啱啱買嗰兩間公司）嘅產能同儲存量，仲好過恒鼎（1393）。」
沈大師回應：「炒變身股風險真係好大，收購項目有冇實際咁理想，要進一步去睇；如果真係炒消息，又冇理由好似𠵱家咁嘅表現，所以我都有啲保留。」馮先生好勤力，佢仲睇埋新銀收購嗰兩間公司嘅財務資料，「我相信應該有作為。」孫柏文就叫佢睇定啲先，「你要有準備承受好大嘅波幅，同埋真係要耐心等吓嘞。做任何開採業嘅生意，都係掘咗出嚟先知有冇，不論油田同礦都係咁話。」沈大師最後提醒佢：「小心睇吓係咪全面性收購，有時啲公司話變身轉型，可能實際只係買咗個礦嘅十分一㗎咋。」
今日嘉賓：亨達集團研究部董事黃敏碩
每日收市後4:30pm
歡迎Phonein28698262
http://appleactionews.com/features/finance/
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
*下午3時半開始，優先接受登記
