如果你唔係十萬九千七未開頭，要買部車首先要考慮嘅係咩？十個有九個都答要慳油囉！坦白講，家陣啲油價仲強過股價，穩定高企，若然部車大食啲條數認真襟計；不過，想慳得嚟部車又見得人嘅唔多，SubaruR1就一定係其中之一，事關每公里大約6毫子兼外形靚仔夠大體，唔砌得都睇得，慳得嚟一啲都唔失禮！
記者：梁美甜
攝影：林栢鈞
模特兒：Nika（BXMedia）
慳油環保車仔
Subaru喺年初推出R2時引來市場極大迴響，誰叫一部四門但MadeinJapan嘅車仔只賣七萬零蚊，仲平過買隻Daytona。最近佢哋再下一城，引入雙門細車仔R1，尺碼同空間都比R2細，但外形就靚仔晒，而且食住慳油環保呢個大潮流，若以廠方公佈數據而言，耗油量可低至每公升行24公里，即係話每公里大約只需6毫子，加上車價減埋政府嘅環保車稅項優惠之後都只係8萬幾，對平時揸開千零二千c.c.車嘅你，每星期行少一兩日嘅油錢，就已經隨時可以「買起佢」，好抵玩！
細車力水一樣掂
千祈咪睇小佢嘅引擎容積得嗰658c.c.，馬力亦只係得54匹，但原來喺一般市區走動綽綽有餘，加速表現都可以，不過用嚟跑大斜路就辛苦啲。最抵死係你無咩踩大腳油嘅話，錶板會顯示「ECO」字樣，表示你揸得好慳油喎，加上車身細捐窿捐罅夠晒靈活敏捷，喺香港地返工出入代步絕對夠玩！想用佢嚟砌車？呢個願望唔會幾萬蚊就買得到囉！
二人同行四人免問
雖則R1外形的骰得嚟好有跑格，但叫得做車仔自然載客量有限；講到明係雙門四座位，用吓腦諗都知部車有幾大，後門兩個位有幾寬敞。只要你稍為高大腳長嘅話，咁就咪學人玩禮讓，免得到時落地腳震震喇！所以話四人家庭，都係揀番R2四門長身車款較合適。
新車速蘋
囗
．車仔細細，市區捐窿捐罅好方便。
．打正旗號環保車，慳油又慳稅。
囗
．後排比較窄，高大肥人勿內進。
．始終馬力細，少行斜路最安全。
SubaruR1規格
引擎：658c.c.直4DOHC
馬力：54ps/6,400rpm
扭力：6.4kgm/4,400rpm
傳動：i-CVT智能無段變速自動波，前輪驅動
查詢：MotorImage（25112727）