汪明荃（阿姐）噚日喺天水圍頌富商場舉行「汪明荃天水圍演唱會」記者會，佢嘅演唱會將於後日喺天水圍運動場舉行，阿姐到時仲邀請埋楊千嬅、何韻詩、胡杏兒、黃宗澤、謝安琪、伍衞國同埋Twins擔任嘉賓。
阿姐噚日同一眾天水圍街坊作近距離接觸，現場播放阿姐嘅經典歌曲，一班有份上台玩遊戲嘅街坊估中歌名就可以得到演唱會門票，阿姐仲以過來人身份鼓勵一班街坊：「我都知道呢區有好多新移民，我1956年喺上海嚟香港，當時都係新移民，嚟到香港好多嘢追唔上，後來都逐一克服，所以我今次嘅口號係香港人幫香港人。」
擴展關懷行動
阿姐話希望由佢發起嘅文化關懷行動可以擴展到其他社區，佢話：「今次嘅對象係天水圍嘅居民，預計派出4,500張門票，希望將來可以去多啲唔同嘅社區，好似深水埗區都係好需要大家嘅關懷。」
