每到年尾又係埋單計數嘅時候，歌手會數吓拎到幾多個獎，小市民可能計吓喺股市賺咗幾多，八方就最想知過去一年邊個人物最受注目。城大統計過去一年見報率，噚日公佈2007全年名人榜，香港區排頭位嘅係煲呔，第二同第三位則分別由鬥到七彩嘅陳方安生同葉劉淑儀兩位阿太奪得。
今年又選特首，又發表文革偉論嘅曾蔭權見報率自然高，排頭位一啲都唔出奇。但立會補選觸發兩太大戰，估唔到短短三個月就令陳太同葉劉彈上三甲之列。
4人新上榜
至於新上榜嘅人物，就有參選特首嘅梁家傑、魔警徐步高同教院前校長莫禮時，仲有已離世嘅女首富龔如心，不過佢哋通通未能擠身頭十名。至於最令八方意外嘅，就係由傳奇風水師躍身成神秘富豪嘅陳振聰居然冇上榜。
除咗政壇人物，藝人方面劉德華同肥肥沈殿霞分別喺名人榜排第5及第6，佢兩位年年上榜，連負責調查嘅鄒嘉彥教授都形容佢哋係娛圈長青樹。
城大同時公佈北京、上海及台灣嘅全年名人榜，北京、台灣民眾同傳媒似乎最關心政治，大部份上榜人物都來自政界，惟獨上海體壇獨大，名人榜三甲分別係劉翔、姚明及易建聯，被喻為下屆國家主席人選嘅習近平只能屈居第四。
京滬台名人榜
全年名人榜
第1名：曾蔭權
第2名：陳方安生
第3名：葉劉淑儀
第4名：陳水扁
第5名：劉德華
第6名：沈殿霞
第7名：小布殊
第8名：胡錦濤
第9名：溫家寶
第10名：馬英九
資料來源：城大語言資訊科學研究中心
