港股明日期指結算，今日放完假返嚟，個市點開都係要睇外圍市況，因為好淡大戶都會借外圍表現搶佔靚位，增加明日結算取勝嘅籌碼，美股周三晚若升勢持續，港股有望高開。
雖然下個禮拜係年結，櫥窗粉飾活動有利好友，不過有一點大家要留意，自從多年前證監會嚴打年結日「嘜價」後，基金嘅櫥窗粉飾活動就由集中喺年結日最後嗰十分八分鐘改為分開幾日以至1個禮拜嚟做，即係話如果年結日之前已經做夠數，咁樣年結日就唔係一定要升，甚至會跌，大家要留意吓。
恒地C輪9876：恒地（012）周一報收73.65元，走勢好靚，短線有機試80元，再高啲就睇83元，可以諗吓隻C輪9876，隻輪現價1.05元，槓桿率7倍（有效4.4倍），對冲值0.64，正股升上80元，9876應該喺1.5元左右，正股升上83元，隻輪應該唔會低過1.72元，正股跌穿70元止蝕。