聖誕節假期，大家見唔到股市過山車同樓價直升機運作，可以專心行街買嘢、睇戲食飯，商場人流量自然又再例牌創新高。今年請嚟多位台灣偶像搞騷嘅新地，旗下12個商場，過去三日有470萬人流，淨係一個觀塘apm，已經佔115萬，比舊年多咗18個巴仙；新地租務總經理馮秀炎話，過去3日apm生意額有2700萬銀，按年增長25個巴仙。純粹計人頭，即係每個人起碼放低咗23蚊喺apm。
好過樓股雙天保至尊
另一個商場大業主信和，旗下7個商場，過去5日人流578萬，旗艦級商場大角嘴奧海城，人流有162萬，多咗12個巴仙，營業額有3380萬銀，平均每個人使咗21蚊。
過去一年樓、股表現雖然反覆，但係大部份人荷包腫脹始終係事實，消費市道旺係好正常。
咁出年又點呢？港鐵早排向旗下商場超過100個商戶做咗個調查，有商戶提出，不如趁出年係奧運年，請劉翔同姚明嚟香港商場行街買嘢，刺激更多人流。有冇得諗華華就唔知，不過，總好過只係靠樓、股雙天保至尊咁患得患失吖。