沙田馬場噚日BoxingDay賽事場面墟冚，公眾席加埋會員棚有24,000幾人，比上次日賽多咗3,000幾人。但旺丁唔旺財，投注額只得約8.9億，係今個月第二低嘅日賽，可能大家都有其他節目，唔得閒投注。
政、商界人士好多都唔喺香港，八方噚日喺馬場廂房四圍蕩，以往熟口熟面嘅高官、富豪唔見影，好似前經濟發展及勞工局局長葉澍堃咁，佢隻團體馬「智勇非凡」跑咗年幾終於開齋，贏番場五班賽事，收26萬幾蚊獎金，但唔見佢拉頭馬。鄉議局主席劉皇發位公子劉業強隻團體馬「好日子」大熱贏三班賽，有獎金44萬幾蚊，但同樣唔見發叔蹤影。反而久違嘅富商趙世光，就趁住愛駒「福喜」出賽，坐住輪椅同囡囡趙式明一齊入場打氣，可惜「福喜」只跑第七。