九年，戰神傳說終於回歸現實。
23號星期日，撇甩Skyline成為獨立車系嘅全新款GT-R終於到港，擁有480匹神級馬力，0-100km/h只需3.5秒，親身體驗係推背再推背，全力加速時你想伸手掂擋風玻璃都兀唔起身。
外形少咗霸氣，格調上升一級，而且和R34相比，一身高科技嘅R35竟然放棄車手最愛嘅棍仔手波，改用雙離合器半自動6前速波箱。戰神放低戰斧改揸步槍，未知車迷接唔接受到，只知車手海堂已經驚嘆新GT-R的神速：「用佢個自動波，轉波加速仲快過用加減波！」
文：嘴嚼爺
攝影：陳陶鈞
協力：鄭達基
實錄！
慢有慢遊 快有快踩
香港地喎，成日行行停停，長啲嗰條叫東廊，但係有最少5個快相位。所以，開呢架GT-R就危險喇，由九龍灣到將軍澳，明知要錫住人哋架車，明知環保大道前後隨時有快相，都唔覺唔覺越開越快，一台3.8公升V6雙渦輪增壓引擎絕非得把聲，請各準車主小心。
人同電腦邊個醒？
新款GT-R居然無棍波版本！旺角、大帽山嗰班轟轟聲車手實唔滿意，但事實以現今科技，不容否認已經嚟到自動波快過手波嘅年代，當然唔係講平價小房車，而係講緊戰神呢類神級跑車。
先拋一堆數字嚇吓你；480匹勁過Audi超級跑車R8嘅420匹、0-100km/h僅3.5秒，啱啱夠贏法拉利新嗰架F430Scuderia嘅3.6秒！實際啲，GT-R採用GR6雙離合器半自動波，啪到RMode（高性能行車模式），轉波過程最短可在0.2秒內完成，反應奇快，難怪夠膽踢走棍波。
我知，淨係搬一大堆數據出嚟都未必夠說服力，所以我搵咗錢家班嘅甩尾王海堂嚟試車，踩盡一轉後同我講嘅第一句：「加減波反應已夠快，但我齋用自動波加速，居然仲快過我自己用加減波！真要挑剔嘅話，係做唔到『踭趾』，同埋Kickdown效果麻麻。」不過，我想講嘅係，唔理人同電腦邊個醒，𠵱家自動波牌人士都可以試吓GT-R嘅辣味。
軟化格局
「外形同上一代唔同晒，可能都係針對歐洲車迷喜好，不過設計好流線，而且𠵱家超跑設計都係趨向咁，都唔興四四方方嘅頭燈。」海堂興奮講緊時，佢班拍戲嘅兄弟已經圍住部車係咁影，筆者淨係聽到不斷重複好靚好型好OK幾個字。但個人感覺，除咗已經唔係獨家專利嘅四盞尾圓燈、同埋車頭車尾車側邊嘅GT-R字樣，真係已經冇乜GT-R霸氣味道，始終上一代已經係9年前嘅事，請接受戰神已經進入新紀元。
耳目一新並非壞事，雙門流線車身格調更高，隱蔽式門柄仲仿效AustonMartin，整體真係好靚，最嬲係冇天窗啫。
唔止外形歐洲超跑化，一打開車頭冚，「個鋪排都係好歐洲車，不過級數真係好高，個龍門架以前最多用膠，但𠵱家就係碳纖。由內到外都冇咗硬繃繃嘅感覺，而且頭先我兜咗幾轉，覺得原裝避震比較軟，錢嘉樂嗰架張桶Seat承包力好啲。」
百萬身價
一百萬，你會買GT-R嗎？「一百萬嘅跑車，實在太多選擇喇。」我問海堂有否興趣科水揸走佢，佢話暫時冇，就算買都會等改良版。
呢個絕對係理性車迷嘅心聲，但係如果你有錢到好似上星期一注獨得6千幾萬嗰位幸運兒咁，又或者你係GT-R死硬情意結Fans，等咗9年，真係充滿期待，筆者搵戰神Fans錢嘉樂試車時，佢助手話：「佢𠵱家喺日本呀，佢聽到有得試又返唔到嚟實好嬲，佢喺嗰邊已經買咗好多本講呢部車嘅書。」
所以據車行高層話我知，呢部GT-R未嚟香港，已經賣出超過10架，俾我影完呢輯相又要嗱嗱臨揸返去，因為又有客落Showroom睇車。
不過，講到抵唔抵，係咪買歐洲車先威啲，就真係靠你心裏面隻鬼話事，正如我夠知鬼妹身材好啲，但由細到大都淨係鍾意睇㗎妹一樣，吹咩？
記者爭試
老龍：喺屋企打PS3隻《GT5P》，揸咗成個禮拜GT-R，本以為對呢架戰神不會太陌生，點知實地坐過揸過先知兩回事！唔敢劈彎只係齋飆大直路，不但低波爆炸力強勁，連上到5波都仍然勁推背，搞到我要膽怯收油，可惜時間緊迫，惟有等下星期Top版到港，再認真一試！
C記：我本來忙緊打稿，聽到戰神GT-R入嚟公司，即刻拉埋老編落樓試車！一坐上去，已深深感受到GT-R嘅強烈殺氣，大直路狂飆，咁大個女都未試過咁猛烈嘅加速推背感，好似飛機起飛，唔係，直頭勁過飛機！
NissanGT-RProfile
引擎：3,799c.c.DOHCV6twin-turbocharged
馬力：480hp/6,400rpm
扭力：60kgm/3,200-5,200rpm
傳動：6前速半自動波箱
查詢：富利堡（28776700）