阿里巴巴（1688）上市唔夠兩個月，集團高層即刻大地震，4個集團高層話要輪休學習，即係去讀吓書充實自己。其實，企業高層放假讀書唔係咩大事，不過，發生喺國內企業，仲要一次過向4件開國功臣開刀，就唔多唔少畀人一種打完齋唔要和尚嘅感覺。
今次俾國內人士視為「輪崗」嘅高層，包括集團COO李琪、CTO吳炯、執行副總裁兼淘寶網總裁孫彤宇，同集團資深副總裁李旭暉，分別會喺明年1月、3月同6月離任。孫彤宇基本上係阿里巴巴嘅創始人之一，其中一項功績係打到eBay要放棄中國市場，而其他3人都係集團早期嘅骨幹成員。
雖然阿里巴巴董事局主席馬雲曾經強調，佢哋要做一間102年嘅企業，需要公司高層不斷學習同進步。究竟今次係「杯酒釋兵權」，定係好似聯想高級副總裁劉軍咁，離職一年讀完書重新復出，真係要放長雙眼。
另外，新一年阿里巴巴亦有唔少調任安排，好似曾鳴會出任集團參謀長，陸兆禧做淘寶網總裁，金建杭調任中國雅虎總裁，邵曉鋒調任支付寶公司執行總裁。