聖誕通常係大吃大喝嘅日子，但呢個聖誕香港地特別多人唔食嘢，佢哋絕對唔係為咗變靚啲，而係為咗佢哋心目中嘅公義。呢邊廂灣仔利東街舊街坊May姐，你哋睇到呢篇文嘅時候，佢已經絕食咗超過80幾個鐘；另一邊廂，係民主黨爭普選嘅馬拉松絕食，不過佢哋嗰隻係「接力」絕食，仲因為咁俾毓民寸㖭。
年近六十 鬥志好驚人
八方絕對唔係鼓勵人絕食，只要係和平同唔傷害到人，每個人都可以選擇適合自己嘅方式表達意見。但客觀比較吓，又不得不佩服就嚟60歲嘅May姐鋼鐵一般嘅鬥志。自從星期日晏晝4點宣佈絕食以來，到𠵱家佢只係飲樽裝水，噚日佢嘅血糖已經跌至危險水平。仲因為咁，利東街現場噚日就爆發咗一場社民連VS公民黨嘅小小風波。
在場為佢檢查身體嘅社民連勞永樂以一貫醫生口脗話，根據世衞嘅指引，當病人仲清醒，要尊重佢嘅意願；所以佢唔能夠強迫拒絕進食嘅May姐打葡萄糖水；公民黨嘅張超雄就以社工角度，話人命關天，應該要May姐停止絕食，幫佢打葡萄糖，唔應該死守啲乜嘢世衞指引。
寒冷天氣下，身體好虛弱嘅May姐大部份時間都要瞓喺度，只係曾經到對面嘅合和中心去廁所。合和方面唔知點解忽然咁幫手，安排張輪椅畀May姐坐。八方向來熱衷陰謀分析，唔知係咪因為市建局計劃喺利東街起停車場，而據聞合和個停車場成日有好多吉位，所以有關方面都支持班街坊嘅行動呢？
至於白鴿黨一連七日嘅絕食行動，噚日已經進入第四日。參加嘅以黨內第二梯隊成員為主，個個都後生過May姐，而且因為係輪流絕食，所以絕食嘅時間由20幾個鐘至幾十個鐘不等，最勁嘅係中常委林子健，話會絕食100個鐘。絕食期間，佢哋會飲水同寶礦力，但就唔會飲市民送嚟嘅湯、果汁之類有色飲料。
接力絕食 白鴿黨被寸
毓民寸民主黨一係就真絕食，搞乜鬼接力絕食吖。但八方覺得最搞笑嘅除咗係曾憲梓、黃宜弘嘅回應外，左報噚日引述中央政策組首席顧問劉兆佳回應民主黨嘅絕食行動，佢話市民唔會認同任何激烈行動。咁叫激？唔係呀，佳叔，咁饑饉三十都好激啦。