《機戰》迷今次完全中伏！萬眾期待嘅《超級機械人大戰OG外傳》──傳說中相信係PS2上之最後一「戰」，原本鐵定於27號到貨，點知今次又出現「偷跑」情況，而且仲係大家最忙又唔為意嘅平安夜（24號）蒲頭。筆者當晚即上最權威之台灣巴哈網都冇人知道，真係俾佢呃得透囉！
記者：朱崇德
OG機械人大集合
所謂OG，其實是OriginalGenerations咁解！大家見慣見熟嘅鐵甲萬能俠、大武士、高達、勇者王等經典日本機械人，都完全唔會喺度搵到，因為佢完全係玩原創人物。咪以為咁就缺乏了人氣度，須知經歷了GBA的《OG》、《OG2》和及後的PS2《OGs》，以及動畫OVA版《OGTheAnimation》、GBA《R》、WS《Compact3》，OG世界裏面嘅原創機體同角色，一樣豐富如繁星，而《OG外傳》就係嚟一次「全登場」式大集合，絕對是所有OG迷夢幻作。
續寫Episode2.5最後結局
今次外傳故事以《OG》、《OG2》及《OGs》為骨幹，但最令人期待是將《OGs》的Episode2.5UnifiedWisdom延續下去，皆因原本只有前半章節，今次《OG外傳》就加以續寫及補足後半部份的故事劇情，將整個章節故事劇情完成，正所謂打機、睇戲睇全套嘛！至於遊戲系統則主要承襲《OGs》，相信打開《機戰》者都好易上手。另外一提者，今集最令人注意是「合流」及「援護攻擊」系統，合流是將兩部機體聯合一起行動，即所謂無論移動或攻擊都變為二為一體，如果將兩組合流機發動援護攻擊，那就變成一次發動4機合攻，打大佬級勁敵機隨時有一招埋單功效。
洗牌遊戲骰仔鬥大
今集遊戲另一新加點子，就是新收錄了《ShuffleBattle》，俗稱「洗牌遊戲」，玩法是以隨機方法點選3、5、10張機械人牌，同電腦或2P作對戰。不過出招就變成隨機的打骰仔，打到大骰者隨時變成大招！此外還加入了熱血、回復等功能卡，同本身遊戲一樣有雙倍攻擊力及補血等能力，幾時要出卡，一樣好有戰略性考慮。每次戰役後可以賺取點數，再可以之抽取機械人卡，空格達180個，一定打到暈！
另一新加遊戲Mode是《FreeBattle》，其實是開放所有機體對戰。平時在故事模式中難得一見的夢幻對戰，大家可以毫無保留地出大招，加埋合流、援護的4機群毆，合戰動畫真係型到爆！
去貨凌厲 １月必斷！
正所謂打Game先知價！現知《OG外傳》Game場定價為$328，相信普遍「機」迷都會感覺合理。不過大家更關心嘅，相信係套特別版吧？一Game送A5尺寸設定集，再另加一隻3吋ART-1小型Figure，現時市價定為$548。以只有24彩頁的書仔，加矮細過山口式一半「不可動」膠公仔，竟然激增$220差價？非「機」迷相信好難理解！不過書內機體資料今次係首度披露，再加ART-1話明唔會以其他任何形式發售，真．機迷相信亦難以抗拒囉！
至於貨量好似話幾緊絀，預計本月底前普通版同限量特別版會全面沽清！須知1月係日本新年，再返貨機會唔高；而且據知日本將於原定的12月27號正常派貨，現知嗰邊特別版已經開定口嗌價$800港元，仲唔快啲手？隨時有機會被迫捱貴貨！
查詢：i-Gamer（27253338）