新城電台呢幾年因為人事調動，搞到個台立立亂，年前朱明銳被調去做新城動力有限公司總裁，由顏聯武上場，結果有一批DJ離職。風水輪流轉，上年顏聯武被拉下馬，朱明銳歸位，快必同梁東幾個DJ就即被炒，話係俾朱明銳報復。據聞新城下個月會開多個財經台，然後同娛樂台合併，娛樂台因此會裁員。
逾10人受影響
點知07年都未過，現任新城娛樂台發展經理嘅黎海珊噚日就宣佈將會離職，佢話：「因為娛樂台財經化，同我風格好唔同，放完聖誕假我就會遞信辭職，我喺新城做咗十年，真係唔捨得。」黎海珊話佢錄咗幾個節目預計1月播，包括訪問曾志偉同徐小明等，佢擔心啲節目唔知仲有冇機會播出。
馮仁昭收到風，新城今次大改革，《點正娛樂》同劉天蘭、岑建勳主持嘅《爸爸媽媽》都會被殺，相關員工冇得留低，新城將於日內派出超過十個大信封，鄭啓泰、李麗蕊等都受牽連，郭偉安就臨危獲救唔使走，大家都以為呢件事係朱明銳意思，其實《點正娛樂》係佢一手籌劃出嚟嘅節目，佢又點會殺自己親生仔。據聞因為人事鬥爭，鬥嚟鬥去，小員工咪做晒炮灰囉，年尾前收大信封，都咪話唔慘。
噚日朱明銳嘅電話長響，新城公關部發言人話朱生忙緊頒獎禮事宜，唔得閒回應，仲話暫時未收到電台大改革嘅通知，又未收到黎海珊離職嘅消息喎。
