德國政府欲立法制定最低工資，工商界反應激烈，快遞商TNT立即宣佈附屬公司裁員，並停止新嘅擴充計劃，一於睇定啲先。德國政府經濟部極力反對，駁斥「最低工資有利工人論」。可惜吖，總理默克爾夫人一於政治掛帥，唔睬經濟部，相信德國會成為歐盟大國之中，最後一個最低工資淪陷區。
香港又點呢？聖誕前碰到一位政界人士，佢話形勢比人強，○八年好可能為最低工資立法。後再與一位以前強烈反對最低工資嘅廠商講到呢件事，廠商話：「行家都知道最低工資會對中小企最為不利，但中小企啲有頭有面人物已經轉晒口號，唔敢反對咯，我哋無謂同曾特首對着幹吖，唔係嘅話，曾特首會嬲我哋不識趣㗎。」廠商口中嘅兩位中小企頭頭，原來係大企業老闆，搞慣政治，梗係識得見風駛𢃇啦。
香港商人最懂得識時務者為俊傑之道，極少講原則，最叻就係跟着領導人走。廠商話：「我本來反對㗎，但煲呔都投降咗，唔再好似以前咁樣反對最低工資立法咯，我咪支持特首囉，將來有乜後果，我唔知，總之唔好在特首面前失分先。」
好咯，廠商唔敢反對，改口支持最低工資，曾特首大可話佢得到商界充分支持，推行立法。呢個情況，究竟雞生蛋還是蛋生雞，無謂深究。社會上仲有冇人反對呀？有，就係經濟學家，與《蘋果日報》幾位評論員，政黨之中，除自由黨外，全部贊成，故此最低工資立法一定可以數夠票，在立法會通過。聽講自由黨研究過經濟學家反對嘅理由，認識到最低工資並非係對工人有利嘅最好方法。但政治現實就係，當中小企、廠商會等等開始睇特首面色轉口風，自由黨如果在議會反對推行最低工資嘅話，有乜嘢好處呢？不如妥協好過。最低工資在世界上好多國家推行，並非因為合乎經濟學原理，而係合乎政治選舉與選票嘅現實，犧牲工人長遠利益在所不惜！